Ný kuðungategund uppgötvaðist við Íslandsstrendur nýverið. Í færslu á vef Hafrannsóknastofnunar er slíkt sagt sjaldgæft og að um sé að ræða afrakstur mikillar vinnu.

„Nýja tegundin hefur verið nefnd eftir fyrrum starfsmanni Hafrannsóknastofnunar Jónbirni Pálssyni og heitir Buccinum palssoni Fraussen, Delongueville & Scaillet, 2024, en tegundin hefur enn ekki fengið íslenskt nafn,“ segir í færslunni.

Nýi kuðungurinn; Buccinum palssoni Fraussen, Delongueville & Scaillet, 2024. Lj´somynd/Hafrannsóknastofnun

Kuðungurinn er um 3 cm á hæð og tilheyrir ættkvíslinni Buccinum eins og beitukóngur.

Uppgötvunina má rekja til samstarfs Jónbjörns og belgísku dýrafræðinganna Christiane Delongueville og Roland Scaillet.

„Jónbjörn starfaði um árabil við hafrannsóknir. Eftir hann liggur fjöldi greina um líffræði hafsins og er hann annar höfunda bókarinnar Íslenskir fiskar. Jónbjörn er vel að þessum heiðri kominn og óskar Hafrannsóknastofnun honum innilega til hamingju,“ segir í færslunni.