Íbúar Los Angeles-borgar eru í áfalli vegna þeirrar miklu eyðileggingar sem gróðureldarnir, sem hafa logað í borginni frá því á miðvikudag, hafa valdið. Alls hafa fimm látist af völdum eldanna.

Bandarískir veðurfræðingar segja að aðstæður á svæðinu séu og muni áfram vera erfiðar.

Nokkrir eldar brenna enn stjórnlaust. Að sögn slökkviliðs borgarinnar er enginn möguleiki á að hefta útbreiðslu eða ná tökum á eldunum sem loga í Pacific Palisades, þar sem margir frægir einstaklingar úr Hollywood eru búsettir, og í úthverfinu Altadena.

Það hefur gengið erfiðlega að ná tökum á eldunum sem hafa lagt stór svæði í rúst. AFP

Rústir einar

„Altadena eru rústir einar,“ segir bandaríska þingkonan Judy Chu. Hún heimsótti björgunarmiðstöð í dag þar sem um 1.000 manns, sem hafa misst heimili sín, hafa leitað skjóls.

„Þau eru dofin. Þau hafa ekki hugmynd um hvað bíði þeirra þegar menn hafa náð tökum á eldunum,“ sagði hún í samtali við bandarísku fréttastöðina KTLA.

Íbúi í Los Angeles sést hér gráta við heimili sitt sem brann til kaldra kola. AFP

Staðan er tvísýn

Rúmlega 130.000 manns hafa neyðst til að yfirgefa heimili sín. Veðurfræðingar segja að staðan sé enn tvísýn þar sem það sé enn hvasst í borginni og mikill þurrkur, því sé viðbúið að nýir eldar kvikni og breiðist út.

Íbúar í Hollywood, sem er hjarta kvikmyndaiðnaðarins í Bandaríkjunum, hafa þó fengið góðar fréttir þar sem búið er að aflétta rýmingu þar eftir að slökkviliðsmönnum tókst að ráða niðurlögum Sunset-eldanna.

AFP

Angist og ofsahræðsla

Fram kemur í umfjöllun AFP að yfir 2.000 byggingar og heimili hafi brunnið, þar af mörg glæsihýsi. Bandarískir fjölmiðlar segja að þetta sé eitt versta áfall í sögu borgarinnar, sem er næst stærsta borg Bandaríkjanna.

Milljónir borgarbúa hafa fylgst með framvindunni í angist og víða hefur brotist út ofsahræðsla og mikill ótti.

Víða hefur vindhraðinn farið upp í 40 metra á sekúndu og þannig hafa eldanir breiðst gríðarlega hratt út.

Kort sem sýnir hvar eldarnir loga. AFP