Kristján Þórður Snæbjarnarson, þingmaður Samfylkingarinnar og formaður Rafiðnaðarsambands Íslands, hefur sagt af sér embætti formanns sambandsins.

Tilkynnti hann um afsögn sína á miðstjórnarfundi þess í dag en þetta kemur fram í færslu Kristjáns á samfélagsmiðlum.

Komið að kaflaskilum

Í færslunni segir Kristján Þórður komið að kaflaskilum þar sem han hefur tekið sæti á Alþingi.

Jafnframt þakkar hann öllu því fólki sem hann hefur unnið með innan verkalýðshreyfingarinnar samstarfið og segist hlakka til að vinna með því áfram í nýju hlutverki.

Varaformaður Rafiðnaðarsambandsins, Andri Reyr Haraldsson, verður starfandi formaður fram að aukaþingi sambandsins 27. febrúar nk. þegar kosið verður um nýjan formann.