Donald Trump, forseti Bandaríkjanna, hefur samkvæmt forsetatilskipun fyrirskipað refsiaðgerðir gegn Alþjóðlega sakamáladómstólnum í Haag.

Trump sakar dómstólinn um ólögmætar og tilhæfulausar aðgerðir sem beinast gegn Bandaríkjunum og Ísrael.

Frétt af mbl.is

Trump vill að Ísraelar afhendi Bandaríkjunum Gasa

Trump hefur fyrirskipað að allir þeir sem aðstoða sakamáladómstólinn í rannsóknum hans sem beinast að bandarískum ríkisborgurum eða bandamönnum Bandaríkjanna geti átt yfir höfði sér fjársektir og takmarkanir á vegabréfsáritun.

Trump skrifaði undir tilskipunina í heimsókn Benjamíns Netanjahús, forsætisráðherra Ísraels, í heimsókn hans til Washington í vikunni.

Gáfu út handtökuskipun á hendur Netanjahú

Í nóvember síðastliðnum hafði sakamáladómstóllinn gefið út handtökuskipun á hendur Netanjahú vegna meintra stríðsglæpa á Gasa, sem Ísraelsmenn hafa harðneitað fyrir. Þá gaf dómstóllinn einnig út handtökuskipun á hendur leiðtoga Hamas-samtakanna.

Meira en 120 lönd eiga aðild að sakamáladómstólnum en Bandaríkin og Ísrael eru ekki á meðal þeirra. Engin viðbrögð hafa komið frá dómstólnum eftir þessa tilskipun Bandaríkjaforseta.