Kristrún Frostadóttir forsætisráðherra flutti stefnuræðu sína á Alþingi á dögunum. Það gerði hún klædd aðsniðnum kjól frá breska fatamerkinu Fold. Kjóllinn var kvenlegur og aðsniðinn í vetrarhvítum lit eins og hann heitir á heimasíðu merkisins.

Frétt af mbl.is

Fátt nýtt í stefnuræðu Kristrúnar

Eaton-kjóllinn frá Fold er klassískt snið frá merkinu og hentar vel fyrir fínni tilefni. Efnið er ofið ítalskt tweed-efni með glitrandi þráðum sem gefur efninu fallegan glans. Ermarnar eru í olnbogasídd og pilsið er sniðið frá mitti sem leggur áherslu á kvenlegu línurnar.

Efnasamsetning kjólsins er 47% bómull, 35% pólýester, 12% akríl og 6% viskós. Kjóllinn kostar 129.100 krónur. Heimasíða Fold sendir til Íslands en þá má gera ráð fyrir því að verðið hækki þegar virðisaukaskatturinn bætist við. 

Kjóllinn er klassískur úr ítölsku tweed-efni. mbl.is/Eyþór

Ætlað konum í atvinnulífinu

Fold var stofnað af Polly McMaster og var ætlað konum í atvinnulífinu. McMaster starfaði áður í „karllægum geira“ eins og hún orðar það á heimasíðu merkisins, og vantaði fatnað í vinnuna. Eini „vinnufatnaðurinn“ sem til var þá var heldur sniðlaus og gerði lítið fyrir hana að hennar mati. Hún kom auga á gat í markaðnum og stofnaði Fold.

Verslun Fold er staðsett við götuna 28 Cadogan Place í Belgravia-hverfi Lundúna. 

Merkið er þekkt fyrir kvenleg, stílhrein og mjög klæðileg föt. Þau bjóða upp á fallega kjóla, pils, dragtir, fylgihluti, skó og í raun allt sem þarf í fataskápinn. 

Það er afar líklegt að Kristrún eigi eða muni bæta við fötum frá Fold nú þegar hún þarf á fáguðum fatnaði að halda. 

Kjóllinn kostar 129.100 krónur og er bresk hönnun.

Sniðið er mjög kvenlegt.