Kristrún Frosta­dótt­ir for­sæt­is­ráðherra seg­ir að það myndi koma sér veru­lega á óvart ef Sam­keppnis­eft­ir­litið myndi samþykkja samruna Íslands­banka og Ari­on banka út frá fyrri ákvörðunum eft­ir­lits­ins. Þá seg­ir hún að ef af samrun­an­um yrði myndi hún hafa áhyggj­ur af sam­keppni á banka­markaði.

„Þessi tíma­setn­ing kom mér á óvart. Það breyt­ir því ekki að þetta er þeirra [stjórn­ar Ari­on banka] ákvörðun að leggja af stað í þessa veg­ferð,“ seg­ir Kristrún spurð um hvort tíma­setn­ing til­kynn­ing­ar Ari­on banka hafi komið sér á óvart, en til­kynn­ing var send út á föstu­dag­inn, skömmu eft­ir að fjár­málaráðuneytið til­kynnti um að opið al­mennt útboð á hlut rík­is­ins í Íslands­banka yrði á „næstu miss­er­um.“

Spurð út í af­stöðu sína til mögu­legr­ar sam­ein­ing­ar bank­anna seg­ist Kristrún skilja vel sjón­ar­mið um aukna skil­virkni, en að fleira þurfi að skoða til að gæta hags­muna al­menn­ings.

Hefði áhyggj­ur af sam­keppni ef samrun­inn færi í gegn

„Við verðum nátt­úru­lega að leyfa þessu að fara í ákveðið ferli núna. Stjórn Íslands­banka er með þetta til umræðu. Ég get þó sagt út frá al­menn­um for­send­um, miðað við fyrri ákv­arðanir Sam­keppnis­eft­ir­lits­ins á fjár­mála­markaði, þá kæmi það veru­lega á óvart að slík­ur samruni yrði samþykkt­ur.

Og ef ég svara út frá minni eig­in póli­tísku skoðun og okk­ar eig­in for­send­um í þess­ari rík­is­stjórn, þá er það svo að við erum kos­in til að gæta al­manna­hags­muna. Ég skil al­veg þau sjón­ar­mið að fólk vilji aukna skil­virkni, það vilji hagræðingu í banka­kerf­inu. En markaðslegt aðhald og sam­keppn­is­for­send­ur skipta líka gríðarlegu máli og þetta er al­veg svona klippt og skorið og ég myndi hafa áhyggj­ur af sam­keppn­is­stöðu á banka­markaði ef slík­ur samruni færi í gegn,“ seg­ir Kristrún.

Tel­ur þú þenn­an samruna þá óheppi­leg­an fyr­ir neyt­end­ur?

„Ég ít­reka það sem ég segi, þarna tak­ast á tvö sjón­ar­mið. Hagræðing og skil­virkni og svo markaðslegt aðhald. Hagræðing og skil­virkni renn­ur fyrst og fremst til neyt­enda ef það er markaðslegt aðhald. Við vær­um kom­in í allt aðra stöðu á banka­markaði ef hér væru tveir stór­ir bank­ar, báðir bank­ar með um­tals­vert eign­ar­hald hjá rík­inu. Ann­ar í 100% eign­ar­haldi og hinn kannski í 20% eft­ir slík­an samruna,“ svar­ar Kristrún.

„Staða sem við vilj­um auðvitað ekki vera í“

Bene­dikt Gísla­son, banka­stjóri Ari­on banka, sagði um helg­ina að það væri hlut­falls­lega of dýrt að starf­rækja þrjá kerf­is­lega banka í kerfi eins og á Íslandi. Spurð út í þessa af­stöðu Bene­dikts seg­ir Kristrún að hægt sé að nota slík rök fyr­ir f lesta starf­semi á Íslandi. Bend­ir hún á að hér búi aðeins um 400 þúsund manns sem sé á við lítið bæj­ar­fé­lag í fjöl­menn­ari ríkj­um.

„Það væri auðvitað út frá hreinni hag­fræði hægt að sam­eina flest fé­lög í eitt áÍslandid, en það er staða sem við vilj­um auðvitað ekki vera í, þannig að það þarf að gæta­ein­hvers kon­arr jafn­væg­is þarna á milli skil­virkni og svo aðhalds á markaði,“ seg­ir Kristrún.

Stjórn­end­ur eiga alltaf að huga að því að há­marka virði bank­ans

Spurð út í þann 5 millj­arða sparnað sem Ari­on banki sér fyr­ir sér að geti orðið til við samrun­ann og hvort slík­ir út­reikn­ing­ar kalli ekki á að Íslands­banki geti tekið frek­ar til í rekstri sín­um og þannig aukið virði bank­ans seg­ist Kristrún ekki geta tjáð sig um slíkt. Tek­ur hún þó fram að það sé stjórn­enda bank­ans að hafa alltaf í huga að há­marka virði bank­ans.