Merki eru enn um að landsmenn hafi svigrúm til neyslu þrátt fyrir langvarandi hávaxtastig. Kortavelta eykst með hverjum mánuðinum. Utanlandsferðir í janúarmánuði hafa aldrei verið jafnmargar og samt virðast yfirdráttarlán ekki hafa færst í aukana. Á sama tíma hefur slaknað þó nokkuð á spennu á vinnumarkaði og eftirspurn vinnuafls dvínað og atvinnuleysi tók stökk upp í 4,2% í janúar síðastliðnum.

Þetta kemur fram í nýútgefinni Hagsjá hagfræðideildar Landsbankans.

Heimilin hafa staðið af sér vaxtastigið 

Heildarkortavelta jókst á milli ára í hverjum mánuði síðasta árs og var í heildina 4,2% meiri en árið 2023. Sami kraftur einkennir byrjun ársins 2025. Þróun kortaveltu þykir gefa góða vísbendingu um þróun einkaneyslu og miðað við kortaveltutölur síðustu mánaða má gera ráð fyrir að einkaneyslan hafi aukist í lok síðasta árs.

Þá þykir þróun kortaveltu bera þess merki að meðalheimilið hafi að flestu leyti staðið af sér vaxtastigið án þess að halda verulega aftur af neyslu. Innlán jukust töluvert og tiltölulega lítið var um yfirdrátt, sem gefur til kynna að heimilin standi að jafnaði vel.

Merki um kólnandi vinnumarkað 

Hægt og rólega hefur dregið úr spennu á vinnumarkaði. Eftir að vextir tóku að hækka stóð vinnumarkaðurinn vel af sér aðhaldið en um mitt ár 2022 fór eftirspurn eftir vinnuafli að minnka. Atvinnuleysi hefur mjakast hægt upp á við á síðasta ári og nú í janúar tók það óvenjustórt stökk á milli mánaða og fór úr 3,8% í 4,2%. Vinnumálastofnun gerir jafnvel ráð fyrir að atvinnuleysi fari upp í 4,4% í febrúar, en svo hátt hefur það ekki verið síðan hagkerfið var í bataferli eftir heimsfaraldurinn.