Oddvitar Samfylkingar, Flokks fólksins, Sósíalista, Pírata og Vinstri grænna hafa náð saman um myndun nýs meirihluta.

Þetta staðfestir Helga Þórðardóttir, oddviti Flokks fólksins í Reykjavík, í samtali við mbl.is.

Vísir greinir frá því að Heiða Björg Hilmisdóttir, oddviti Samfylkingarinnar í Reykjavík, verði næsti borgarstjóri og hefur það eftir öruggum heimildum.

Föstu­dag­inn 7. fe­brú­ar sleit Ein­ar Þor­steins­son, borg­ar­stjóri og odd­viti Fram­sókn­ar­flokks­ins, meiri­hluta­sam­starfinu í borgarstjórn.

Frétt af mbl.is

Nýr borgarstjóri kosinn á morgun

Spennt fyrir nýjum meirihluta

Ertu spennt fyrir komandi meirihlutasamstarfi?

„Já, bara mjög spennt. Það er spennandi að taka við nýjum áskorunum,“ segir Helga. 

Oddvitar flokkanna eru í þessum töluðu orðum að ræða við sína borgarstjórnarflokka og bakland til að kynna fyrir þeim nýjan meirihluta. mbl.is hefur ekki náð í neinn borgarfulltrúa í verðandi meirihluta borgarstjórnar nema Helgu. 

Hún segir að Flokkur fólksins, Vinstri græn og Sósíalistar séu ekki að ganga inn í fallinn meirihluta heldur sé þetta „algjörlega nýr meirihluti“ með nýja ásýnd. 

Á þessum tímapunkti er hún ekki til í að ræða áherslur nýs meirihluta.