Í lok janúar lauk keppninni Barlady-kokteilakeppninni sem er hönnuð fyrir konur og kvár í barbransanum. Keppnin var haldin af Barþjónaklúbbi Íslands í samstarfi við Samtök íslenskra eimingarhúsa. Eimingarhúsin sem tóku þátt í keppninni að þessu sinni voru Hovdenak Distillery, Eimverk Distillery, Brunnur Distillery (Himbrimi) og Reykjavík Distillery.

Ashley Marriot, barþjónn á Amma Don og Michelin-stjörnustaðnum ÓX, kom, sá og sigraði með kokteilinn sinn Atomic Bloom. Hún verður fulltrúi Íslands í alþjóðlegu Barlady-keppninni sem haldin verður á Kúbu þann 8. mars næstkomandi.

Drykkurinn hennar er einstaklega fallegur, fagurgrænn og borinn fram á einfaldan og fagran hátt.

Einfaldleikinn í fyrirrúmi. mbl.is/Árni Sæberg

Ætlaði aldrei að verða barþjónn

Þegar Ashley var spurð út í barþjónastarfið, hvort það hafi verið draumurinn í bernsku, segir hún svo ekki vera.

„Ég ætlaði aldrei að verða barþjónn, ég eiginlega slysaðist inn í veitingageirann sem stúdent í háskóla. Eitt leiddi af öðru og ég sótti svo störf á fínni veitingastöðum. Áhuginn á víni og góðri þjónustu hjá mér óx mikið á þessum tíma. Ég hef unnið af og til á ýmsum börum og veitingastöðum, oftast sem yfirþjónn eða vaktstjóri,“ segir Ashley.

Ashley Marriott blandar sigurkokteilinn sinn á Ömmu Don, barnum á stjörnuveitingastaðnum ÓX við Laugaveginn. mbl.is/Árni Sæberg

Aðspurð segir hún að blanda kokteil sé alls ekki ólíkt og að baka. „Ég hef ávallt haft gaman af bakstri og hef bakað bæði mér til yndisauka og í aukavinnu. Eftir að ég skoðaði kokteilagerð nánar sá ég að hún er ekkert ósvipuð bakstri, nema kannski öðruvísi bragð en þá kom áhuginn og tilraunastarfsemin hófst,“ segir Ashley og brosir.

Samfélagið og félagsskapurinn í barþjónaheiminum heillar

Starf hennar í veitingageiranum er í hlutastarfi og hún nýtur þess að taka vaktir á mismunandi stöðum og á einkaviðburðum þegar til hennar er leitað. „Það sem heillar mig fyrst og fremst við starfið er samfélagið og félagsskapurinn í barþjónaheiminum. Fólkið er nærandi og upplífgandi sem ég starfa með og það er gefandi að vera í starfi sem þessu.“

Nú vannst þú keppnina Barlady á dögunum með glæsilegri frammistöðu, hvað gerir það fyrir þig að vinna keppni sem þessa?

„Ég var satt að segja hissa á því að mér tókst að vinna þessa keppni. Ég skráði mig bara til skemmtunar, þar sem ég hef ekki mikið tækifæri til að verða skapandi á bak við barinn. Keppnin var í raun skemmtileg tilbreyting frá því sem ég geri frá degi til dags í skrifstofustarfi mínu. Ég er auðmjúk yfir því að hafa búið til drykk sem dómurum fannst verðugt að velja sem vinningskokteil. Ég er líka óendanlega þakklát fyrir gjafmildi Snorra og Judith í Reykjavík Distillery fyrir allar vörurnar sem þau gáfu mér til að undirbúa drykkinn,“ segir Ashley meyr.

„Þetta var í raun fyrsta barþjónakeppnin sem ég hef tekið þátt í þrátt fyrir að hafa starfað í meira en 10 ár í greininni. Ég get ekki talað af mikilli keppnisreynslu en mér þótti þetta skemmtilegt og kem pottþétt til með að gera þetta aftur.“

Hún er með öll handtökin á hreinu. mbl.is/Árni Sæberg

Hefur orðið fyrir áreiti í starfi

Er erfiðara að vera kona í þessu hlutverki en karlmaður?

„Ég tel að það séu nokkrir þættir í þessari atvinnugrein sem eru talsvert erfiðari fyrir konur en starfsgreinin er sögulega karlkynsstarf. Ég hef persónulega orðið fyrir áreiti við störf á bar þar sem gestir segja óviðeigandi hluti og eru með niðrandi ummæli. Ég myndi segja að ein stærsta áskorunin sem konur standi frammi fyrir í þessari grein sé sú sama og konur standa frammi fyrir í mörgum atvinnugreinum. Það er líka enn mismunur á launakjörum. Þrátt fyrir þetta er rík saga kvenna í barþjónaheiminum sem gengu gegn samfélagslegu „normi“ og enduðu með því að búa til heimsfræga drykki. Mér finnst ég heppin að hafa ávallt verið lyft upp af karlkyns samstarfsmönnum og fengið hvatningu frá þeim en ég veit að þetta á ekki alltaf við um aðrar konur.“

Hver er leyndardómurinn bak við að útbúa skotheldan kokteil sem slær í gegn?

„Mikilvægasti þátturinn í góðum kokteil er sá sami og fyrir góðan mat eða köku. Þetta snýst allt um jafnvægi. Án jafnvægis getur allt þetta mjög auðveldlega orðið ósmekklegt.“

Kúba bíður

Það styttist óðum í ferðina til Kúbu og Ashley er orðin mjög spennt að fá að spreyta sig á erlendum vettvangi í keppninni.

„Ég er afar þakklát og finnst það mikill heiður að hafa unnið þessi verðlaun. Ég ætla að gera mitt besta sem fulltrúi Íslands í alþjóðlegu Barlady-keppninni á Kúbu. Ég er kærastanum mínum, David Hood, afar þakklát fyrir stuðninginn, aðstoðina og þolinmæðina við að hlusta á mig vesenast yfir minnstu smáatriðunum. Hann ætlar meira að segja að koma með mér til Kúbu. Eftir þá ferð förum við saman til Stokkhólms á Bartenders Choice Awards þar sem Amma Don er tilnefnd í flokkunum
Best cocktail bar og Best cocktail menu,“ segir Ashley að lokum og horfir björtum augum til framtíðarinnar í hlutverki sínu sem barþjónn.