Emmanuel Macron Frakklandsforseti er sagður ætla að nýta sér einstakt samband sitt við Donald Trump Bandaríkjaforseta til þess að tryggja að sjónarmið Evrópu skili sér við samningaborðið í viðræðum Trumps og Vladimírs Pútin Rússlandsforseta um frið í Úkraínu.

Macron er væntanlegur til Washington á morgun en morgundagurinn markar þrjú ár frá innrás Rússa í Úkraínu. 

„Ég er að fara þangað til þess að vekja athygli á mikilvægi öryggi Evrópu. Rússar eru vel vopnaðir og halda áfram að bæta í vopnabúr sitt,“ sagði Macron við franska blaðamenn í París.

Telur sig eiga einstakt samband við Trump 

Macron er sagður telja sig hafa þann eiginleika yfir aðra leiðtoga Evrópu að hann eigi í mjög góðu sambandi við Trump og telur sig geta haft mikil áhrif á hann. 

„Ég ætla að segja honum að hann megi ekki sýna á sér veikleika í viðræðum við Pútin. Það er ekki það sem hann er þekktur fyrir.“

Macron og Trump tóku báðir við sem forsetar í fyrsta sinn árið 2017 og hafa unnið nokkuð náið saman í gegnum tíðina. Macron náði þó ekki að sannfæra Trump að halda Bandaríkjamönnum inni í Parísarsáttmálanum en Bandaríkin drógu sig úr sáttmálanum á fyrra kjörtímabili Trumps.

Enn áhrifamikill alþjóðlega

Völd Macron hafa farið dvínandi í Frakklandi eftir að hafa rofið þing og boðað til þingkosninga á seinasta ári.

Paul Taylor, sem starfar hjá sérfræðingahópi um Evrópumál í Brussel, segir að áhrif Macron séu þó enn mikil alþjóðlega og þá sérstaklega þegar kemur að varnarmálum. 

Trump hefur sakað Frakka og Breta um aðgerðaleysi þegar kemur að því stuðla að friði í Úkraínu.