Leikkonan Sarah Michelle Gellar, sem lék eldri systur Michelle Trachtenberg, í sjónvarpsþáttaröðinni Buffy the Vampire Slayer, minntist leikkonunnar á Instagram-síðu sinni fyrr í dag, einum degi eftir að greint var frá því að Trachtenberg hefði fundist látin í íbúð sinni á Manhattan.

Trachtenberg var 39 ára gömul.

Frétt af mbl.is

Gossip Girl-leikkona látin

„Michelle, hlýddu á mín orð. Ég elska þig. Ég mun ávallt elska þig. Það erfiðasta í þessum heimi er að lifa og hrærast í honum. Ég mun vera hugrökk. Ég mun lifa....fyrir þig,“ skrifaði Gellar við fallega myndaseríu af þeim.

Minnast frábærrar konu

Fjölmargar Hollywood-stjörnur hafa minnst leikkonunnar síðasta sólarhringinn og deilt myndum og fallegum orðum á Instagram-síðum sínum.

„Hvíl í friði elsku Michelle,“ skrifaði leikkonan Kim Cattrall, sem er best þekkt fyrir hlutverk sitt í Sex and the City. Hún lék ásamt Trachtenberg í Disney-kvikmyndinni Ice Princess frá árinu 2005. 

„Ég er niðurbrotin yfir fréttunum um andlát Michelle. Hún kom með ástríka og góða orku á tökusett Buffy. Hugur minn er hjá fjölskyldu og vinum Michelle,” skrifaði Alyson Hannigan, sem kynntist Trachtenberg við gerð unglingaþáttaraðarinnar Buffy the Vampire Slayer.

Leikkonan Blake Lively rifjaði upp góðar stundir frá tökusetti Gossip Girl og lýsti Trachtenberg sem ljúfri og góðri manneskju í færslu sem hún birti á Instagram.

Trachtenberg fór með hlutverk Georginu Sparks í unglingaþáttaröðinni Gossip Girl á árunum 2007 til 2014. Skjáskot/Instagram