Þór­hild­ur Þor­kels­dótt­ir hef­ur í nægu að snú­ast þessa dag­anna. Hún er fram­kvæmda­stjóri hjá Brú Stra­tegy ásamt því að vera dag­skrár­gerðar­kona og hlaðvarps­stjórn­andi. Hún er alltaf hrika­lega flott til fara, en hún seg­ist hafa haft áhuga á tísku lengi.

„Ég hef pælt í tísku og klæðaburði fólks frá því að ég man eft­ir mér. Ég er alin upp í sveit þar sem ég dundaði mér oft tím­un­um sam­an við að púsla sam­an dress­um úr skápn­um hjá mömmu og setja upp tísku­sýn­ing­ar. Þessi áhugi hef­ur alltaf fylgt mér en sér­stak­lega elska ég að fylgj­ast með götu­tísku og hvernig ólíkt fólk klæðir sig. Tísk­an er skemmti­leg­asta tján­ing­ar­formið.“

Hvernig mynd­irðu lýsa fata­stíln­um þínum?

„Í dag myndi ég lýsa hon­um sem frek­ar kven­leg­um og klass­ísk­um en með góðu vinta­ge - twisti. Þegar ég var yngri átti ég það tals­vert til að hoppa á hin og þessi trend og pæla kannski ekki mikið í nota­gild­inu en í seinni tíð reyni ég að taka gæði fram yfir magn og pæli frek­ar mikið í góðum efn­um og sniðum. Ég er með reglu um að reyna að eiga alls ekki of mikið í fata­skápn­um mín­um og spara frek­ar og velja mér svo færri og vandaðri hluti.“

Þór­hild­ur hef­ur haft áhuga á tísku síðan að hún man eft­ir sér. Hér er hún glæsi­leg í miðbæ Reykja­vík­ur. Ljós­mynd/​Aðsend

Áttu þér upp­á­halds­búðir eða merki?

„Hér heima er upp­á­halds­fata­búðin mín klár­lega Andrá Reykja­vík og þar eru mín upp­á­halds­merki, The Garment, Stine Goya, Gest­uz, Agolde og fleiri. Ég vann sjálf í vinta­ge versl­un í mörg ár og vin­kon­ur mín­ar segja að ég sé með svarta beltið í að „thrifta“ enda hef ég gert mjög mikið af því í gegn­um tíðina. Mér finnst það vera ákveðin hug­leiðsla að fá mér góðan kaffi­bolla og rölta í vinta­ge eða resell versl­an­ir og gramsa, en þessa dag­ana úr­valið af þeim mjög gott á Íslandi. Hring­ekj­an er í miklu upp­á­haldi hjá mér og þar finn ég alltaf eitt­hvað. Ég elska líka að thrifta á net­inu og ég elt­ist við vinta­ge hönn­un­ar­ger­sem­ar á hinum og þess­um síðum eins og The Real Real, Depop, Ebay og jafn­vel Face­book Mar­ket­place. Ég hef ná að gera al­veg fár­an­lega góð kaup með þess­um hætti.“

Hún lýs­ir stíln­um sín­um sem kven­leg­um og klass­ísk­um. Ljós­mynd/​Aðsend

Hvar verslaðu mest?

„Ég versla orðið mjög mikið á net­inu. Það er þægi­legt að skrolla og fá yf­ir­sýn yfir úr­valið áður en maður kaup­ir eitt­hvað og svo er þjón­ust­an víða orðin það góð að var­an er kom­in inn um lúg­una næsta dag, og oft­ast er auðvelt að skila. Ég fagna mjög þess­um tíma­bæru fram­förum í póstþjón­ustu! Ann­ars finnst mér líka mjög gam­an að kíkja í búðir í út­lönd­um í góðu tómi, en það er líka sér­stakt áhuga­mál hjá mér að elta uppi góða flóa­markaði í þeim lönd­um sem ég ferðast til. Þar ger­ast lang skemmti­leg­ustu kaup­in.“

Þór­hild­ur er mikið fyr­ir nátt­úrú­lega förðun og leyf­ir húðinni að njóta sín. Ljós­mynd/​Aðsend

Hvert sæk­irðu tísku­inn­blást­ur?

„Fæ mik­inn inn­blást­ur frá vin­kon­um mín­um en ég skoða líka mikið tísku­tengt efni á In­sta­gram og TikT­ok. Al­g­or­ythm­inn þar veit hvað ég vil sjá.“

Mál­arðu þig mikið dags dag­lega eða þegar þú ferð fínt út?

„Ég mála mig oft­ast létt áður en ég fer út í dag­inn og er lang­mest fyr­ir nátt­úru­lega förðun. Ég hef líka áhuga á góðum húðvör­um og hef komið mér upp ansi góðri rútínu í þeim mál­um. Ég er með nokk­ur góð og fljót­leg förðun­ar­trix sem ég lærði af smink­un­um í sjón­varp­inu þegar ég vann þar sem koma sér mjög vel þegar ég fer eitt­hvað fínna, t.d. að nota sólar­púður sem augnskugga og að setja á mig augn­blý­ant með væng á núll einni. Svo er gott vara­kom­bó lyk­il­atriði.“

Hvaða fylgi­hluti not­ar þú mest?

„Ég er mikið fyr­ir belti og á orðið gott safn af þeim til að brjóta upp ein­falt dress og nota t.d. yfir jakka. Ég elska líka sólgler­augu hvernig sem viðrar. Góð taska er svo alltaf punkt­ur­inn yfir i-ið.“

Áttu þér upp­á­halds­flík?

„Það er lík­lega Aft­ur ull­ar­kápa sem ég hafði haft augastað á mjög lengi en hún kom í tak­mörkuðu upp­lagi og var ófá­an­leg. Þegar ég hafði gefið upp alla von um að eign­ast káp­una, sá ég hana fyr­ir til­vilj­un til sölu á Vist­eyri í full­komnu ástandi. Ég hef aldrei verið jafn fljót að kaupa mér neina flík.“

Plan­arðu fram í tím­ann í hverju þú ætl­ar að klæðast eða fer fata­valið eft­ir skapi?

„Dags­dag­lega fer það bara eft­ir skapi, eða veðri þann dag­inn. Ef ég er að fara eitt­hvað fínna er ég oft­ast búin að setja eitt­hvað sam­an í hug­an­um fyr­ir­fram.“

Þór­hild­ur ger­ir mikið af því að kaupa notaðar flík­ur, og vel­ur gæði fram yfir magn. Ljós­mynd/​Aðsend

Hef­ur stíll­inn þinn breyst mikið í gegn­um tíðina?

„Já hann hef­ur gert það eins og hjá flest­um og ég hef farið í gegn­um ýmis tíma­bil. Einu sinni gekk ég ekki í öðru en blóma­kjól­um og pels­um og ég tók líka ágæt­is skinku­tíma­bil í denn. Með ár­un­um hef­ur kom­ist ágæt­is jafn­vægi á þetta og ég er frek­ar meðvituð um hvað klæðir mig vel og pass­ar við minn stíl.“

Á óskalista Þór­hild­ar á nýju ári eru Karla leðurtaska frá Kalda og Salomon striga­skór fyr­ir vorið. Ljós­mynd/​Aðsend

Hvað er á döf­inni hjá þér?

„Það er alltaf nóg um að vera í vinn­unni hjá Brú Stra­tegy þar sem við aðstoðum hin ýmsu fyr­ir­tæki við stefnu­mót­un, markaðsmál, hönn­un og al­manna­tengsl. Eins er ým­is­legt skemmti­legtí píp­un­um varðandi Eft­ir­mál, hlaðvarpið sem við Nadine Guðrún Yag­hi höld­um úti. Svo er ég far­in aðtelja niður í sum­arið, en ég hef fulla trú á því að veðrið verði með okk­ur í liði í ár.“