Heiða Björg Hilmisdóttir nýr borgarstjóri í Reykjavík og ein af kryddpíunum, eins og borgarstjórnarmeirihlutinn kallar sig, tók sig vel út í silfurlituðum kryddpíukjól þegar hún mætti á frumsýningu á Ladda. Með í för var eiginmaður hennar Hrannar Björn Arnarsson sem var einu sinni á kafi í stjórnmálum og meðlimur R-listans þegar hann var og hét. 

Það voru þó ekki bara stjórnmálamenn á sýningunni því Laddi laðaði að sín spariklædda frumsýningargesti úr öllum lögum samfélagsins. Þar var Guðmundur Kristjánsson forstjóri Brims og hans fallega kona, Helga Stefánsdóttir búningahönnuður, Þorleifur Örn Arnarsson leikstjóri og Erna Mist myndlistarmaður, Gaukur Úlfarsson kvikmyndagerðarmaður, Breki Karlsson formaður Neytendasamtakanna, Jóhann Alfreð uppistandari og Stefán Eiríksson útvarpsstjóri og hans huggulega eiginkona Helga Snæbjörnsdóttir. Þar var líka einn harðasti gagnrýnandinn þessa dagana, Símon Birgisson, með skyggð auðmannagleraugu og möllet! 

Sýningin um Ladda er mikið ævintýri en þar er Vala Kristín Eiríksdóttir leikkona mikill senuþjófur, eða ljónatemjari og sögumaður. Hún inniheldur ekki bara fimmaurabrandara sem voru fyndnir í kringum 1980 heldur tilfinningaríkar senur sem kölluðu fram táraflóð í salnum. Á bak við grínið er alltaf einhver harmur en í sýningunni um Ladda er hann afhjúpaður!