Síðastliðinn föstudag fór fram glæsilegt galakvöld til styrktar Ljósinu, endurhæfingarmiðstöð fyrir krabbameinsgreinda. Er viðburðurinn hluti af afmælisári Ljóssins sem nú safnar fyrir nýju húsnæði. Kvöldið var hið glæsilegasta og vel sótt af gestum sem mættu í sínu fínasta pússi.

Ýmsir góðir styrktaraðilar lögðu sitt af mörkum til að gera kvöldið mögulegt.

„Það er ómetanlegt að finna velviljann í samfélaginu. Við þurfum öll að standa saman í að byggja nýtt hús fyrir fólkið okkar. Ég er full þakklætis öllum þeim sem lögðu sitt af mörkum, hvort sem er með aðföng, skemmtiatriði eða komu á viðburðinn okkar” segir Erna Magnúsdóttir, framkvæmdastýra Ljóssins.

Dagskrá kvöldsins var fjölbreytt og skemmtileg.

Selma Björnsdóttir og Friðrik Ómar Hjörleifsson voru veislustjórar og sáu um að halda fjörinu gangandi fram eftir kvöldi. Halldór Gunnar, Sverrir Bergmann og Jóhanna Guðrún Jónsdóttir tróðu þá einnig upp. DJ Dóra Júlía og Atli Kanill sáu svo um að þeyta skífum.

Boðið var upp á glæsilegt málverkauppboð með góðum undirtektum.