Bakarinn og konditorinn Guðrún Erla Guðjónsdóttir bakaði fermingartertuna sem boðið var upp á í hennar eigin fermingu en þá töfraði móðir hennar, Hulda Sigurþórsdóttir, tertuna fram. Hún var afar hrifin af kökunni þá og handbragði móður sinnar en í dag er hún hrifnari af smjörkremstertum og bakaði hún eina slíka á dögunum.

Guðrún Erla Guðjónsdóttir hefur mikla ástríðu fyrir sínu fagi og hefur þrátt fyrir ungan aldur þróað margar uppskriftir að veislutertum. mbl.is/Karítas

Guðrún er 24 ára gömul og hefur lokið konditor-námi í Danmörku. Hún útskrifaðist með sérstöku hrósi fyrir góðan árangur á sveinsprófi sínu og hefur tekið þátt í baksturskeppnum og hefur meðal annars unnið í keppninni um Köku ársins sem haldin er árlega,

„Mamma er föst á því að hafa þessa klassísku fermingarbók“

Þegar Guðrún fremdist var fermingarveislan haldin heima og boðið var upp á glæsilega máltíð og kaffihlaðborðið kom á eftir.

„Við vorum með fermingarveisluna mína heima hjá okkur. Við buðum meðal annars upp á hamborgarhrygg með brúnni sósu og sykurbrúnuðum kartöflum. Síðan voru kjúklingagrillspjót og fermingarfranskar eins og kallaðar voru. Einnig var fjölbreytt úrval af meðlæti, grænar baunir og salat svo fátt sé nefnt.

Síðan var boðið upp á glæsilegt kaffihlaðborð á eftir. Ég man vel eftir fermingartertunni en mamma sá um hana. Mamma var alveg föst á því að hafa þessa klassísku „fermingarbók“ þannig hún tók sig til og gerði kökuna alveg sjálf. Ég var líka mikið fyrir ljósbláan lit á þeim tíma, þannig að sjálfsögðu var kakan í þeim stíl. Síðan gerði hún kransaköku og Rice Krispies-köku líka,“ segir Guðrún dreymin á svip.

Móðir Guðrúnar, Hulda Sigurþórsdóttir, gerði fermingartertuna fyrir hana frá grunni og skreytti í litunum sem þá voru í uppáhaldi. Ljósmynd/Aðsend

„Fermingartertan var þessi klassíska marsípanterta með svambotni, rjóma og kokteilávöxtum. Mamma skreytti hana síðan með súkkulaði og marsípanskrauti sem hún lærði að gera á kransakökunámskeiði. Síðan var hún líka með fersk ber á kökunni.“

Smjörkremskökurnar eru heitastar í dag

Í dag myndi Guðrún velja að vera með smjörkremsköku. „Ég er mikið búin að vera að fylgjast með kökutískunni undanfarið og hef tekið eftir að smjörkremskökur eru þær heitustu núna, sérstaklega hjá minni kynslóð. Þessi kaka, sem mig langar að deila uppskriftinni að með lesendum, er draumurinn núna. Hún er algjör sprengja, þó að ég segi sjálf frá.“

Fermingartertan hennar Guðrúnar Erlu er gullfalleg og myndi sóma sér vel á hvaða veisluborði sem er. Takið eftir krossinum á tertunni, skemmtileg hugmynd sem gerir hana táknræna. mbl.is/Karítas