Bandaríski grínistinn Tracy Morgan, sem er best þekktur fyrir leik sinn í þáttaröðunum Saturday Night Live og 30 Rock, snöggveiktist þegar hann fylgdist með leik New York Knicks og Miami Heat á Madison Sqaure Garden í New York-borg á mánudag.

Morgan, sem sat á hliðarlínunni ásamt félaga sínum, varð snögglega óglatt og endaði á að kasta upp.

Myndir og myndskeið af atvikinu hafa farið eins og eldur í sinu um netheima síðustu klukkustundir.

Morgan, sem er 56 ára, var fluttur burt af vellinum í hjólastól þar sem hann átti, að sögn viðstaddra, í miklum erfiðleikum með að halda jafnvægi.

Ekki er vitað um líðan hans né hvort hann hafi verið fluttur á sjúkrahús.