Hækkun veiðigjalda mun hafa slæm áhrif á smærri útgerðir í landinu og verða til þess að fólk á landsbyggðinni missi vinnuna. Þar að auki mun þetta stuðla að frekari samþjöppun í sjávarútveginum.

Þetta segir Örvar Marteinsson, formaður Samtaka smærri útgerða, í samtali við mbl.is.

„Þetta blasir bókstaflega hræðilega við okkur,“ segir Örvar

Rík­is­stjórn­in kynnti á þriðju­dag hug­mynd­ir um tvö­föld­un auðlinda­gjalds í sjáv­ar­út­vegi.

Frétt af mbl.is

Þungt högg fyrir landsbyggðina

Samþjöppun og atvinnumissir sjómanna

Útgerðir í Samtökum smærri útgerða eru fyrst og fremst í krókaaflamarkinu og eru línubátar. Að mestu er veidd ýsa og þorskur.

Auðlindagjald á ýsu á að hækka um 25% og yfir 60% á þorski.

„Ég held að þetta komi til með að leggjast mjög þungt á þær útgerðir sem eru innan okkar samtaka, sérstaklega af því að svigrúm til hagræðingar er ekkert hjá okkur,“ segir hann.

Í krókaaflamarkinu má einungis róa með línu og handfæri, en samtökin hafa barist fyrir meira frelsi í þessum efnum til þess að geta hagrætt í rekstri. Örvar segir að línuútgerð sé afskaplega dýr í rekstri.

„Miðað við það að við getum ekki hagrætt á nokkurn hátt þá held ég að afleiðingarnar hljóti að verða fækkun útgerða, sem þýðir náttúrulega bara aukin samþjöppun og atvinnumissir sjómanna á bátunum,“ segir hann.

Frétt af mbl.is

Breytingin hefði skilað 10 milljörðum í fyrra

Ekkert samráð

Örvar segir að útgerðirnar í samtökunum séu aðeins á landsbyggðinni og því megi segja að hækkunin muni bitna verst á landsbyggðinni.

Var eitthvað samráð við ykkur áður en þessi áform voru kynnt?

„Nei. Það er ósköp. Það var ekkert samráð,“ segir hann.

Hann segir að smærri útgerðir hefðu verið til í að kynna fyrir stjórnvöldum áhrifin af breytingunum fyrir útgerðir í krókaaflamarkinu.

„Ef við ætlum að halda okkur við þá stefnu að það eigi að vera störf við útgerð í landinu og að of mikil samþjöppun í sjávarútvegi sé neikvæð, þá hefðum við viljað segja þeim að þetta getur bara endað á þann veg að það verður aukin samþjöppun. Ekki síst hjá okkur af því að bátarnir geta ekki hagrætt. Þetta geti ekki farið á önnur veiðarfæri þar sem það er ódýrara og þvíumlíkt.“

Örvar segir að hækkunin muni valda samþjöppun í sjávarútvegi. mbl.is/Alfons

„Það á ekki að vera neitt leyndarmál“

Örvar segir að þessar breytingar muni hafa áhrif hjá öllum sjávarútvegsfyrirtækjum en að áhrifin muni fyrst sjást hjá þeim sem eru í krókaaflamarkinu. Segir hann að þetta muni þó einnig hafa áhrif hjá útgerðum sem eru í aflamarkinu. 

„Þetta hlýtur að flýta fyrir því að menn leggi upp laupana,“ segir hann og bætir við:

„Daði Már á nú að vita þetta og það stendur meira að segja í skýrslunni frá Auðlindinni okkar, þar er skýrt tekið fram að allar rannsóknir sýni fram á það að aukin gjaldtaka í sjávarútvegi flýti fyrir samþjöppun. Það á ekki að vera neitt leyndarmál og það á að vera gjörsamlega augljóst,“ segir Örvar.

Spurður hvort að það sé slæmt að það verði samþjöppun í sjávarútvegi segir hann að það muni leiða til þess að menn missi vinnuna og að það muni bitna á sjávarþorpum út á landi.