Lýsi hf. segir að áform ríkisstjórnarinnar um hækkun veiðigjalda sé alvarleg ógn við tilvist fyrirtækisins sem starfað hefur í 87 ár.

Þetta kemur fram í umsögn fyrirtækisins við frumvarpi Hönnu Katrínar Friðriksson atvinnuvegaráðherra sem miðar að því að tvöfalda veiðigjöld.

Varað hefur við því að fiskvinnslur fari í auknum mæli erlendis ef breytingin nær í gegn.

Frétt af mbl.is

Þúsundir vinnslustarfa í húfi

Meiri arður í að flytja aflann óunninn úr landi

Lýsi segir að alla tíð hafi fyrirtækið fullnýtt hráefni og afurðir sem verða til við vinnslu sjávarafurða.

„Verði tillaga frumvarps um auknar álögur stjórnvalda á sjávarútveginn að raunveruleika, má búast við verulegum samdrætti í framboði þessara aukaafurða sem Lýsi hf. byggir sína tilveru á,“ segir í umsögninni.

Lýsi segir fyrirséð að útgerðir muni hafa meiri arðsemi af því að flytja aflann óunninn úr landi vegna verulega lakari samkeppnisaðstöðu við vinnslu á fiski hér á landi.

Enn fremur sé líklegt að stór hluti bolfisks verði unninn á sjó eða fluttur úr landi sem hráefni til vinnslu í niðurgreiddum sjávarvinnslum í Evrópulöndum.

„Ólíklegt má teljast að Lýsi hf. takist að ná aukaafurðum af þessum fiski aftur til Íslands til vinnslu með tilheyrandi kostnaði,“ segir í umsögninni.

Ógerlegt að sækja flest hráefni til vinnslu erlendis frá

Lýsi vekur athygli á því að fyrirtækið hafi markaðssett vörur sínar sem íslenskar í flestum tilfellum, þær séu framleiddar á Íslandi með endurnýtanlegri orku og hráefnin frá vottuðum fiskveiðum.

Þessi sérkenni fyrirtækisins leiði því til þess að það megi „teljast því sem næst ógerlegt fyrir okkar fyrirtæki að sækja flest hráefni til okkar fjölþættu vinnslu erlendis frá“.

„Áætlanir stjórnvalda eru því alvarleg ógn við tilvist Lýsi hf. eftir 87 ára þróunarvinnu og uppbyggingu á vinnslu og mörkuðum fyrir aukaafurðir úr íslenskum sjávarútvegi,“ segir að lokum í umsögninni.