Gosið sem hófst á Sundhnúkagígaröðinni virðist vera búið, að sögn sérfræðings á Veðurstofunni.

Gossprungan sem myndaðist nærri Grindavík í morgun virðist hafa lokast og bersýnilega hefur dregið úr virkni gossins sem hófst á Sundhnúkagígaröðinni seint á tíunda tímanum í morgun, þriðjudag. 

Frétt af mbl.is

Gos gæti brotist út nær Vogum og Reykjanesbraut

„Það virðist vera meira eða minna búið, þetta gos,“ segir Benedikt Gunnar Ófeigsson í samtali við mbl.is en hann er fagstjóri aflögunarmælinga á Veðurstofu Íslands.

„Ég held að það sé bara engin virkni eftir. Það er allavegana orðið erfitt að finna hana.“

Benedikt Gunnar Ófeigsson, fagstjóri aflögunarmælinga á Veðurstofunni. mbl.is/Eyþór Árnason

Skjálftavirkni er enn mikil, en færist norður

Skjálftavirkni er enn mikil á svæðinu og eins og fram hefur komið er sú kvika sem spúist hefur upp á yfirborðið í dag aðeins brot af því magni sem var í kvikuhólfinu. Það er því nóg eftir í tanknum.

Þá segist Veðurstofan sjá merki um að að kvika sé enn að færast inn í hólfið.

Frétt af mbl.is

Gos gæti brotist út nær Vogum og Reykjanesbraut

Erum við að búast við því að gosið byrji aftur á hverri stundu?

„Ekki á hverri stundu, skjálftavirkni er talsvert minni og við sjáum ekki merki um að kvika sé að leita sér leiðar upp á yfirborðið,“ svarar Benedikt Gunnar.

En skjálftavirknin heldur samt áfram og það er alls ekki útilokað að kvika komi upp á yfirborðið eða að annað kvikuinnskot verði, að hans sögn.