Hlutabréf í bílafyrirtækinu Tesla hækkuðu í verði á hlutabréfamörkuðum að nýju í dag eftir dýfu í kjölfar þess að ársfjórðungsuppgjör fyrirtækisins var kynnt í morgun. Kemur hækkunin í kjölfar fréttar Politico um að Musk muni hætta eða í það minnsta draga verulega úr vinnu sinni í tengslum við niðurskurðaraðgerðir sem hann vinnur fyrir ríkisstjórn Donalds Trumps Bandaríkjaforseta. 

Hlutabréf í Teslu féllu um 13% í morgun eftir að ársfjórðungsuppgjör fyrirtækisins sýndi dræmari sölu en búist hafði verið við í fyrri áætlunum. Um miðjan dag birtist hins vegar frétt í Politico um að Musk hygðist fljótlega einbeita sér að því að vera forstjóri fyrirtækisins að nýju í stað þess að leiða niðurskurðaraðgerðir Doge-hópsins. Við það hækkuðu hlutabréfin um 3,8%.

Margir hafa furðað sig á stöðu Musks í ríkisstjórn Trumps en hann hefur reglulega fengið að hafa sig frammi við ríkisstjórnarborðið án að hafa fengið formlegt umboð til þess. Sjálfur hefur Trump sagt að hann vilji hafa Musk sér við hlið eins lengi og auðið er en jafnframt hefur Trump sagt að hann búist við því að Musk muni að endingu snúa sér að stjórnun fyrirtækja sinna.