Íslendingar láta sig flest mál varða og ekki síst þegar þau varða okkur sjálfa. Fyrr í kvöld tilkynnti Donald Trump Bandaríkjaforseti 10% lágmarkstoll á allar innfluttar vörur og enn hærri gagntolla á fjölda ríkja.

Ísland er ekki á lista yfir þjóðirnar sem fá á sig gagntolla og því verður 10% tollur á allar innfluttar vörur frá Íslandi. Aftur á móti verður 20% tollur á vörur frá Evrópusambandinu og 37% tollur á vörur frá Kína. 

Sigmundur Davíð Gunnlaugsson, formaður Miðflokksins, skrifaði á X að þetta styrkti stöðu Íslands hlutfallslega.

Ísland nú með samkeppnisforskot á ESB

Tryggvi Hjaltason, fyrrverandi formaður hug­verkaráðs Samtaka iðnaðarins, segir á Facebook að Ísland hafi verið að fá 10% viðbótar samkeppnisforskot inn á Bandaríkjamarkað gagnvart öllum ríkjum Evrópusambandsins.

„Það er ansi mikið veganesti. Spilum vel úr þessu. Förum í enn meiri sókn inn á Bandaríkjamarkað,“ skrifar hann. 

Frétt af mbl.is

Þorgerður um nýjustu vendingar: „Honum var alvara“

Gunnar Smári Egilsson, leiðtogi Sósíalista, fylgdist með blaðamannafundi Trumps og hafði þetta um hann að segja:

„Þetta er eins og að lenda við hliðina á drukknum manni í langflugi. Mikil reiðinnar ósköp hvað þessi maður er raupsamur og leiðinlegur.“

„Farðu í rass og rófu“

Ef skoðuð eru ummælin undir færslum mbl.is á Facebook má sjá að sumir eru svo sannarlega ekki sáttir.

„Farðu í rass og rófu. Þú tapar þessu stríði,“ skrifar einn netverji. 

Annar netverji spyr hvort að Íslendingar þurfi ekki að byrja að sniðganga bandarískar vörur.

„Þurfum við eitthvað að „lúffa“ fyrir þessu? Hætta að kaupa allt sem við getum frá BNA? Kaupa bara frá Kanada?“ spyr viðkomandi. 

Frétt af mbl.is

Tollar Trumps: Sjáðu listann