Evrópusambandið undirbýr aðgerðir í tollamálum til þess að svara þeim 20% tolli sem ríkisstjórn Donalds Trumps hefur ákveðið að setja á innfluttar vörur frá löndum sambandsins.

Þetta kom fram í máli Ursulu von der Leyen, forseta framkvæmdastjórnar Evrópusambandsins, í samtali við fréttamenn í Úsbekistan þar sem hún er stödd vegna ráðstefnu Evrópu- og Asíuríkja.

Segir hún að þjóðir sambandsins séu að leggja lokahönd á mótvægisaðgerðir vegna tolla á innflutt stál. Eins að unnið sé að frekari aðgerðum til að verja fyrirtæki í Evrópusambandinu án þess að útlista það nánar.

Skellur fyrir bílaiðnaðinn 

Auk þess sem 20% tollur hefur verið settur á vörur sambandsins hafa Bandaríkin tilkynnt um 25% toll á innfluttar bifreiðar. Er það talsverður skellur fyrir bílaiðnað í Evrópu sem er með sterka markaðshlutdeild í Bandaríkjunum.

Þjóðarleiðtogar í Evrópusambandinu hafa almennt talað fyrir því að aðgerðum Bandaríkjanna verði mætt af yfirvegun. Þannig hafa margir talað fyrir því að reyna að ná sanngjörnu samkomulagi við Bandaríkin þannig að báðir aðilar geti hugsað sér að gefa eftir.

Í sterkri stöðu 

Von der Leyen sagði í ræðu á Evrópuþinginu í vikunni að hún líti svo á að Evrópa sé í góðri samningsstöðu gagnvart Bandaríkjunum vegna stærðar markaðarins.

En ítrekaði um leið mikilvægi þess að færa sig frá átökum í átt að samningaviðræðum.

Nefnir tæknirisa

Olaf Scholz, kanslari Þýskalands, gaf hins vegar í skyn að Evrópusambandið gæti beint aðgerðum sínum að starfsemi bandarískra tæknirisa í Evrópu. Ber þar t.a.m. að nefna Meta,  Google, Amazon og Microsoft. 

Olaf Scholz, kanslari Þýskalands. AFP

„Þetta er árás á skipulag sem hefur skapað hagsæld um allan heim. Viðskiptaskipulag sem í grunninn er afleiðing áherslna Bandaríkjamanna í heimsmálunum,“ segir Scholz.

19. aldar aðferðir við áskorunum 21. aldarinnar 

Emanuel Macron Frakklandsforseti sagði á fundi með fyrirtækjaeigendum í Evrópu að stoppa verði allar fjárfestingar í Bandaríkjunum meðan ástandið varir.

Macron á fundi með Bandaríkjaforseta í febrúar. AFP/Ludovic Marin

„Hvaða skilaboð myndi það senda ef við myndum halda áfram að fjárfesta milljörðum evra í Bandaríkjunum?“ er haft eftir Macron á fundinum.

Pedro Sanhez, forsætisráðherra Spánar, var einnig harðorður í garð aðgerða Trumps.

„Hvernig á það að gagnast nokkrum að beita 19. aldar aðgerðum við þeim áskorunum sem blasa við á 21. öldinni,“ segir hann.