Alþingi | 3. apríl 2025
Ýjar að Ásthildi Lóu hafi verið fórnað
Sigríði Á. Andersen, þingmanni Miðflokksins, og Ingu Sæland, félags- og húsnæðismálaráðherra, var heitt í hamsi er þær tókust á í óundirbúnum fyrirspurnatíma á Alþingi í morgun.
Ýjar að Ásthildi Lóu hafi verið fórnað
Alþingi | 3. apríl 2025
Setja bókamerki
Sigríði Á. Andersen, þingmanni Miðflokksins, og Ingu Sæland, félags- og húsnæðismálaráðherra, var heitt í hamsi er þær tókust á í óundirbúnum fyrirspurnatíma á Alþingi í morgun.
Sigríði Á. Andersen, þingmanni Miðflokksins, og Ingu Sæland, félags- og húsnæðismálaráðherra, var heitt í hamsi er þær tókust á í óundirbúnum fyrirspurnatíma á Alþingi í morgun.
Vildi þar Sigríður fá svör við á hverju nákvæmlega Ásthildur Lóa Þórsdóttir, fyrrverandi mennta- og barnamálaráðherra, axlaði ábyrgð er hún sagði sig frá embættinu.
Sigríður hafði einnig tekið málið fyrir í óundirbúnum fyrirspurnartíma á mánudag þar sem hún beindi fyrirspurn sinni að Kristrúnu Frostadóttur forsætisráðherra. Þar ýjaði hún að því að forystumenn ríkisstjórnarinnar hefðu þvingað Ásthildi Lóu Þórsdóttur til að segja af sér ráðherradómi og tók Sigríður í sama streng í dag.
„Axla ábyrgð á hverju?“
Vísaði Sigríður til þess að dómsmálaráðherra hafi sagt Ásthildi Lóu axla ábyrgð er hún sagði sig frá embætti sínu.
„Axlað ábyrgð á hverju? Getur hæstvirtur félagsmálaráðherra upplýst þingheim um það á hverju ráðherrann hafði axlað ábyrgð?“ spurði þingmaðurinn og benti á að Ríkisútvarpið væri nú búið að leiðrétta umfjöllun sína um mál Ásthildar.
Vísaði hún einnig til þess að Inga hefði lýst málinu sem stormi í vatnsglasi og kvaðst Sigríður sammála því.
Spurði hún því næst af hverju Inga hefði ekki staðið með Ásthildi á meðan umfjöllun stóð yfir og hvort Inga sæi eftir því að hafa ekki gert það.
„Hvers vegna feykti stormurinn í vatnsglasinu þessum ráðherra úr embætti?“
Ákvörðunin hafi verið Ásthildar
Því næst tók Inga til máls og sagðist hafa staðið algerlega í báða fætur með Ásthildi en ítrekaði að það hafi verið ákvörðun Ásthildar sjálfrar að segja sig frá embættinu í ljósi komandi fjölmiðlaumfjöllunar.
Það væri m.a. til þess að skyggja ekki á þá vinnu sem sett hafði verið af stað í mennta- og barnamálaráðuneytinu sem og störf sem ríkisstjórnin væri að vinna að.
„Hún vildi engan veginn að hún og hennar persónulega líf tæki allt sviðið. Hún var frábær ráðherra og við vitum að hún er bara að hefja sinn pólitíska feril og hún mun koma grjóthörð til baka sem þingmaður,“ sagði Inga og þakkaði jafnframt Sigríði fyrir hennar mikla áhuga á hvernig hafi staðið á afsögn Ásthildar Lóu.
„En ég ítreka: Ég stóð með henni alla leið. Þetta var hennar ákvörðun. Ég tek ekki ákvarðanir fyrir ráðherra í ríkisstjórn Íslands, hvort heldur sem formaður Flokks fólksins eða sem félags- og húsnæðismálaráðherra.“
Valkyrjurnar hafi kosið að fórna ráðherranum
Sakaði þá Sigríður Ingu um að svara í engu spurningu sinni og krafðist aftur svara við á hverju Ásthildur hefði axlað ábyrgð.
Ýjaði hún að því að mögulega hefði það verið ríkisstjórnin sjálf sem hafði verið hrædd við komandi fjölmiðlaumfjöllun, frekar en Ásthildur.
„Og í stað þess að standa með ráðherranum gegn hótunum og afarkostum utan úr bæ þá kusu valkyrjurnar svonefndu að fórna ráðherra sínum.
Telur hæstvirti félagsmálaráðherra það hafa styrkt stjórnarsamstarfið að forystumönnum ríkisstjórnarinnar hafi ekki tekist að verjast þessari hótun utan úr bæ um persónuleg málefni ráðherrans öðruvísi en þannig að ráðherrann er látinn taka pokann sinn og þessi fyrrverandi samstarfsmaður í ríkisstjórn er kjöldreginn í fjölmiðlum um allan heim? Eru þessi málalok til að styrkja tiltrú almennings á stjórnmálum á Íslandi?“ spurði Sigríður áður en Inga tók til máls á ný.
Líkt og Sigríður sjálf hafi setið fundinn
„Ég er eiginlega að verða ekki bara orðlaus heldur hálf hauslaus yfir þessum áhuga sem háttvirtur þingmaður virðist hafa á því dapra máli sem þarna átti sér stað.“
Sagði Inga það vera engu líkara í sleggjudómum Sigríðar en að hún hafi sjálf setið þann fund þegar ákvörðunin hafi verið tekin.
„Ég veit það ekki, hún er kannski með einhverja spæjarastarfsemi þarna inni í fundarherberginu þar sem við vorum og getur þá kannski bara upplýst okkur um hvað raunverulega þar fór fram.“
Sagði Inga það vera neikvætt og niðurlægjandi fyrir Sigríði að koma fram með sleggjudóma um hvað gæti hafa gerst þegar hún hefði í raun enga hugmynd um það, en mátti þá heyra í Sigríði kalla úr þingsalnum er Inga gekk frá púltinu:
„Svaraðu því þá.“
