Landris held­ur áfram við Svartsengi en hraðinn fer hægt minnk­andi. Miðað við hraða kviku­söfn­un­ar síðustu vik­ur fara lík­ur á nýju eld­gosi að aukast þegar líða fer á haustið að sögn Veður­stofu Íslands.

Þá hef­ur dregið úr jarðskjálfta­virkni við kviku­gang­inn.

Þetta kem­ur fram í upp­færðri frétt á vef Veður­stof­unn­ar, en þar er jafn­framt tekið fram að hættumat­skort hafi verið upp­fært og gild­ir það til 20. maí að öllu óbreyttu.

Skýr merki

„Af­lög­un­ar­gögn (GPS) sýna skýr merki um áfram­hald­andi landris í Svartsengi en dregið hef­ur úr hraða þess und­an­farn­ar vik­ur. Vís­inda­menn hafa lagt mat á hvenær lík­ur á nýju kviku­hlaupi eða eld­gosi muni aukast. Í því mati er gert ráð fyr­ir að sama magn af kviku þurfi að safn­ast und­ir Svartsengi og í fyrri at­b­urðum á Sund­hnúks­gígaröðinni. Miðað við að hraði landriss sem mælst hef­ur síðustu vik­ur hald­ist óbreytt­ur má gera ráð fyr­ir að lík­ur á nýju kviku­hlaupi eða eld­gosi fari að aukast þegar nálg­ast haustið. Ef hraði á landrisi, og þar með kviku­söfn­un, und­ir Svartsengi breyt­ist hef­ur það áhrif á þetta mat,“ seg­ir í til­kynn­ing­unni.

Þá kem­ur fram að vís­inda­menn Veður­stof­unn­ar vinni nú að end­ur­skoðun á sviðsmynd­um og leggi meðal ann­ars mat á það hvort að áfram þurfi sama magn af kviku að safn­ast und­ir Svartsengi til að koma af stað nýju kviku­hlaupi og jafn­vel eld­gosi.

Mik­il­vægt að skoða þróun yfir lengri tíma­bil

Þá seg­ir að af­lög­un­ar­gögn sýni að landris sveifl­ist oft lít­il­lega frá degi til dags, jafn­vel þó að und­ir­liggj­andi kvikuinn­streymi sé stöðugt. Þess­ar dag­legu sveifl­ur geta or­sak­ast af veðri, skekkj­um í mæl­ing­um eða öðrum nátt­úru­leg­um þátt­um sem hafa lít­il áhrif á heild­ar­mynd­ina.

„Ef aðeins er skoðað stutt tíma­bil í einu þá gæti það gefið ranga mynd af því hvort landris sé að aukast eða minnka. Því er mik­il­vægt að greina þró­un­ina yfir viku eða lengra tíma­bil til að fá raun­hæfa mynd af því sem er að ger­ast. Því er mik­il­vægt að túlka þessi gögn með hliðsjón af þróun yfir lengri tíma­bil frem­ur en að túlka mæl­ing­ar frá ein­staka GPS-punkt­um á milli daga,“ seg­ir enn frem­ur.

Tekið er fram að jarðskjálfta­virkni mæl­ist áfram við kviku­gang­inn sem myndaðist 1. apríl en dregið hafi úr virkn­inni frá gos­lok­um og hafi að meðaltali nokkr­ir tug­ir jarðskjálfta mælst á sóla­hring síðustu tvær vik­ur.