Gagnastuldur og njósnir PPP | 12. maí 2025
Dómsmálaráðherra ekki kallaður á opinn fund
Ekki stendur til að kalla Þorbjörgu Sigríði Gunnlaugsdóttur dómsmálaráðherra á opinn fund stjórnskipunar- og eftirlitsnefndar Alþingis vegna gagnaleka frá sérstökum saksóknara.
Dómsmálaráðherra ekki kallaður á opinn fund
Gagnastuldur og njósnir PPP | 12. maí 2025
Setja bókamerki
Ekki stendur til að kalla Þorbjörgu Sigríði Gunnlaugsdóttur dómsmálaráðherra á opinn fund stjórnskipunar- og eftirlitsnefndar Alþingis vegna gagnaleka frá sérstökum saksóknara.
Ekki stendur til að kalla Þorbjörgu Sigríði Gunnlaugsdóttur dómsmálaráðherra á opinn fund stjórnskipunar- og eftirlitsnefndar Alþingis vegna gagnaleka frá sérstökum saksóknara.
Nefndin fundaði um málið í Smiðju Alþingis í dag en Vilhjálmur Árnason, formaður nefndarinnar og þingmaður Sjálfstæðisflokksins, og María Rut Kristinsdóttir, varaformaður nefndarinnar og þingmaður Viðreisnar, ræddu málið við blaðamann að fundi loknum.
„Við ræddum þessi mál og hvernig þau geta komið til nefndarinnar og við erum aðallega að einbeita okkur að því hvernig borgarinn geti treyst því að sinna réttinda sé gætt við framkvæmd réttarvörslukerfisins,“ segir Vilhjálmur.
Mikilvægt að hafa frið
Ríkissaksóknari hefur falið lögreglunni á Suðurlandi að rannsaka meint brot er varða umfangsmikinn gagnastuld úr kerfum sérstaks saksóknara fyrir rúmum áratug.
Nefnd um eftirlit með lögreglu hefur einnig tekið upp málið og verður að teljast líklegt að það verði rætt á Alþingi í dag.
„Við erum ekki að fara að rannsaka einhver mál sjálf. Við erum bara að hafa eftirlit með því að framkvæmdin sé eftir lögum og reglum,“ segir Vilhjálmur.
„Það er svo mikilvægt að þeir sem starfa í réttarvörslukerfinu í dag fái frið til þess. Við teljum að um leið og almenningur fái þetta á hreint, það auðveldi þau störf.“
Unnið að málinu á næstu fundum
Vilhjálmur segir að nefndin sé nú að afla sér upplýsinga um málið og er reiknað með því að unnið verði að málinu á fundum nefndarinnar á miðvikudaginn og föstudaginn.
Hann segir að næstu skref séu meðal annars að fá dómsmálaráðherra og aðra sem geta hjálpað nefndinni til að fá yfirsýn yfir málið til þess að upplýsa nefndina að stöðu mála.
Ætlið þið að boða dómsmálaráðherra á opinn fund?
„Ekki opinn fund, ekki til þess að byrja með alla vegana,“ segir Vihjálmur.
Horfa minna í baksýnisspegilinn
María Rut segir að nefndarmenn hafi allir verið sammála um næstu skref og að vanda verði til verka.
„Það var mjög góð umræða í nefndinni og við öll sammála um að vanda okkur og horfa svolítið fram á veginn og minna í baksýnisspegilinn,“ segir María Rut.
Eitt af því sem nefndin ætlar að kanna er „hvort að staðan í dag sé ekki bara í góðum málum“, að sögn Vilhjálms.
Mikið vatn hafi runnið til sjávar síðan meintur gagnastuldur var en nefndin vilji ganga úr skugga um að við framkvæmd réttarvörslukerfisins í dag séu borgaraleg réttindi tryggð.
