Snorri Más­son þingmaður Miðflokks­ins gerði barneign­ir inn­fæddra Íslend­inga að umræðuefni í ræðu á Alþingi í dag.

Snorri er ný­kom­inn aft­ur til starfa eft­ir barneign­ar­leyfi en hann og eig­in­kona hans, Nadine Guðrún Yag­hi, eignuðust sitt þriðja barn í apríl.

„Þar er maður alltaf auðvitað djúpt snort­inn af þakk­læti gagn­vart þeim ein­stöku kon­um sem halda uppi fæðingaþjón­ust­unni,“ sagði Snorri.

„Stjórn­mála­mann­in­um í manni verður það á að hugsa að miðað við hvað við höf­um allt til alls þarna, miðað við hvað aðstæður eru góðar, þá erum við ekki að nýta þetta kannski al­veg nógu vel. Ég veit ekki hvort að þær væru sam­mála mér, það er auðvitað mikið að gera, en við erum ekki að fæða nógu mikið af börn­um.“

Frétt af mbl.is

„Hvers á lands­byggðin að gjalda?“

Þjóðin sé hálfpart­inn að deyja út

Snorri sagði að hver kona eign­ist að meðaltali 1,53 börn en það þurfi 2,1 barn til þess að viðhalda þjóðinni.

„Við erum ekki bara að skreppa sam­an, held­ur erum við hálfpart­inn að deyja út ef við tök­um svo strangt til orða,“ sagði Snorri.

Í út­reikn­ing­um hans tel­ur hann ekki inn­flytj­end­ur held­ur ein­göngu inn­fædda Íslend­inga, eða 330.000 manns.

„Eft­ir 90 ár af óbreyttri fæðingatíðni verðum við orðnir 200.000 Íslend­ing­ar. Ef fæðingatíðnin lækk­ar áfram niður í 1,1, sem hún hef­ur sann­ar­lega gert sums staðar, þá end­um við ná­lægt 100.000 manns eft­ir 90 ár.“

Vill hann að stjórn­völd taki málið al­var­lega, setji það í for­gang og skoði að fara í nýj­ar aðgerðir, „eitt­hvað sem send­ir skila­boð inn í umræðuna um að barneign­ir séu málið“.

Biðlaði hann einnig til al­menn­ings um að íhuga barneign­ir: „Þetta er ekki svo mikið vesen, þó þetta sé sann­ar­lega vesen.“