„Þetta var rosa­lega erfið og sárs­auka­full ákvörðun,“ sagði Ásthild­ur Lóa Þórs­dótt­ir, alþing­ismaður og fyrr­ver­andi mennta- og barna­málaráðherra, klökk í viðtali á Sprengisandi.

Ásthild­ur Lóa tók aft­ur sæti á þingi á mánu­dag. Hún tók sér tveggja mánaða frí frá þing­störf­um eft­ir að hún sagði af sér ráðherra­embætti í kjöl­far fjöl­miðlaum­fjöll­un­ar um að hún hafi eign­ast barn með 16 ára dreng þegar hún var 22 ára. 

Frétt af mbl.is

Lang­flest­ir telja ákvörðun Ásthild­ar rétta

Frétt af mbl.is

Ásthild­ur Lóa snýr aft­ur á þing

Ásthild­ur Lóa seg­ist sjá á eft­ir ráðuneyt­inu. Hún tel­ur hins veg­ar að það hafi verið rétt ákvörðun að segja af sér embætti. 

Spurð hvers vegna hún hafi tekið sér leyfi frá þing­störf­um sagði Ásthild­ur Lóa um­fjöll­un­ina hafa verið áfall fyr­ir sig og sína fjöl­skyldu. „Við vor­um bara brot­in.“

„Þetta er rosa­legt áfall. Ég eig­in­lega bara skreið í skjól, ég skreið í hýði. Ég talaði ekki við neinn. Ég fór ekki út, ég fór ekki út í búð eða neitt, vegna þess að and­litið á mér var út um allt. Þó að umræðan hafi snú­ist mér í vil al­veg svaka­lega hratt þá var þetta bara ofboðslega óþægi­leg til­finn­ing,“ sagði Ásthild­ur Lóa.

Lang­ar aft­ur í ráðuneytið

Aðspurð sagðist hún vilja fara aft­ur í embætti mennta- og barna­málaráðherra, en að nýr ráðherra, Guðmund­ur Ingi Krist­ins­son, hafi henn­ar stuðning. 

„Ég ætla ekki að fara í graf­göt­ur með það, mig lang­ar gríðarlega mikið að fara aft­ur í þetta embætti,“ sagði Ásthild­ur Lóa og bætti við:

„Það er kom­in þarna ráðherra og hann á all­an minn stuðning. Það verður bara að koma í ljós hvað ger­ist í framtíðinni. Hvað mig lang­ar og hver er raun­veru­leik­inn það er kannski ekki endi­lega sami hlut­ur­inn. Maður verður bara að standa með þess­ari ákvörðun. Ég verð bara að gera það. Ég á ekki kröfu á það að starf­andi ráðherra segi af sér eða eitt­hvað þess hátt­ar. Ég á það ekki og kem ekki til með að gera hana.“