Útlend­inga­stofn­un hef­ur tekið þá ákvörðun um að fresta brott­vís­un Oscars And­ers Flor­ez Boca­negra úr landi vegna viðkvæmra aðstæðna sem hann er í. Gögn bár­ust Útlend­inga­stofn­un núna fyr­ir helgi sem staðfestu þær erfiðu aðstæður sem hann er í. Þau gögn höfðu áhrif á þessa niður­stöðu. 

Þetta staðfest­ir Helga Vala Helga­dótt­ir, lögmaður Oscars, í sam­tali við mbl.is. Brott­vís­un Oscars átti að fara fram í nótt og til stóð að flytja hann aft­ur til Kól­umb­íu. 

Oscar var send­ur úr landi í októ­ber í fyrra eft­ir að hon­um og föður hans var synjað um alþjóðlega vernd. Þeir komu sam­an til lands­ins árið 2022 eft­ir að glæpa­menn í Kól­umb­íu hótuðu þeim líf­láti. Vís­ir greindi fyrst frá niður­stöðunni að brott­vís­un Oscars væri frestað. 

Faðir Oscars er sagður hafa beitt hann of­beldi og af­salaði sér for­ræði yfir hon­um. Hann endaði á göt­unni í Bógotá í mánuð, þar til að Sonja Magnús­dótt­ir og Svavar Jó­hanns­son, fóst­ur­for­eldr­ar Oscars, tóku hann að sér og komu hon­um aft­ur til Íslands. Oscar dvel­ur hjá Sonju og Svavari sem hafa bar­ist fyr­ir því að hann fái að búa á Íslandi.

Frétt af mbl.is

Óvíst hvort nefnd­in taki mál Oscars fyr­ir

Víðir Reyn­is­son, formaður alls­herj­ar- og mennta­mála­nefnd­ar Alþing­is, greindi frá því í sam­tali við mbl.is á dög­un­um að ólík­legt væri að nefnd­in myndi ná að ræða um­sókn Oscars um ís­lensk­an rík­is­borg­ara­rétt áður en það ætti að vísa hon­um úr landi. 

Upp­fært kl. 16.32:

Útlend­inga­stofn­un hef­ur sent frá sér at­huga­semd þar sem stofn­un­in vill koma á fram­færi leiðrétt­ingu á atriði sem kom fram kom í máli Helgu Völu Helga­dótt­ur, lög­manns Oscars. Útlend­inga­stofn­un seg­ir ástæðuna fyr­ir frest­un­inni vera þá að formaður alls­herj­ar- og mennta­mála­nefnd­ar Alþing­is hafi veitt stofn­un­inni upp­lýs­ing­ar um það að séu yf­ir­gnæf­andi lík­ur á því að gerð verði til­laga að frum­varpi um að Oscar fái ís­lensk­an rík­is­borg­ara­rétt með lög­um.