Veiðigjalda­frum­varpið var aðalræðuefnið und­ir fund­arliðnum fund­ar­stjórn for­seta á Alþingi í dag. Þar tók­ust þing­menn meiri­hlut­ans og stjórn­ar­and­stöðunn­ar á í orðastríði.

Bergþór Ólason, þingmaður Miðflokks­ins og nefnd­armaður í at­vinnu­vega­nefnd, hóf umræðuna á því að gagn­rýna að beiðni um að fá Skatt­inn fyr­ir at­vinnu­vega­nefnd hefði verið hafnað í morg­un. Sagði Bergþór út­reikn­inga frá Skatt­in­um sýna tölu­verðar skekkj­ur í út­reikn­ing­um at­vinnu­vegaráðuneyt­is­ins varðandi frum­varpið.

Því ætti að tryggja að Skatt­ur­inn gæti komið til fund­ar við nefnd­ina og út­skýrt til að mynda hvar mis­tök at­vinnu­vegaráðuneyt­is­ins lægju.

„Al­gjört of­beldi“

Því næst kom Jón Gunn­ars­son, þingmaður Sjálf­stæðis­flokks­ins og 2. vara­formaður nefnd­ar­inn­ar, fram og tók und­ir orð Bergþórs.

„Ég vil einnig nefna það að maður upp­lif­ir vinnu­brögðin í hátt­virtri at­vinnu­vega­nefnd þannig að ekki sé hægt að líkja því við annað en al­gjört of­beldi, og það þegar svona grund­vall­ar­upp­lýs­ing­ar eru að koma fram nán­ast á síðustu klukku­tím­un­um, eins og eru að koma frá Skatt­in­um, sem varða grund­vall­ar­atriði í þessu máli, og okk­ur er hafnað um að fá þá á fund nefnd­ar­inn­ar,“ sagði Jón.

Þá sagði hann að fjöldi annarra um­sagnaraðila hefði einnig ekki fengið tæki­færi til að koma fyr­ir nefnd­ina, og nefndi jafn­framt að Byggðastofn­un hefði verið hafnað ít­rekað. Sömu­leiðis hefði fjár­mála­fyr­ir­tækj­um, sem öll væru byrjuð að reikna sig inn í áhrif veiðigjald­anna, verið hafnað.

„Svona get­um við talið upp list­ann enda­laust, virðuleg­ur for­seti, og það er ekki hægt að líkja þessu við annað en al­gjört of­beldi í vinnu­brögðum. Fyr­ir utan það, nátt­úr­lega, hversu hróp­lega óvönduð vinnu­brögð er um að ræða í þessu mik­il­væga máli.“

Njáll Trausti Friðberts­son, þingmaður Sjálf­stæðis­flokks­ins og nefnd­armaður í nefnd­inni, tók und­ir orð Jóns. Sagði Njáll Trausti að gera þyrfti miklu bet­ur en gert hefði verið þegar kæmi að vinnu við veiðigjöld­in. Það væri eins og verið væri að reyna að klára vinn­una eins hratt og hægt væri.

Jón Gunn­ars­son, þingmaður Sjálf­stæðis­flokks­ins. mbl.is/​Eyþór Árna­son

Ekki full­orðnum mönn­um til sóma

Næst­ur tók til máls formaður nefnd­ar­inn­ar, Sig­ur­jón Þórðar­son.

Sagði hann að vinna væri haf­in við nefndarálit þar sem til­lit yrði tekið til þeirra sjón­ar­miða sem kæmu fram í upp­lýs­ing­um frá Skatt­in­um.

Þá sagði hann það fá­rán­legt að menn skyldu vera að „kvarta og kveina“ yfir gesta­kom­um nefnd­ar­inn­ar, sem væru yfir 50 tals­ins. Þá væri „væl og skæl“ full­orðinna manna á þing­inu þeim ekki til sóma þegar verið væri að vanda til vinnu­bragða í mál­inu.

Sig­ur­jón Þórðar­son, þingmaður Flokks fólks­ins og formaður at­vinnu­vega­nefnd­ar. mbl.is/​Eyþór

„Standa vörð um sér­hags­muni stór­út­gerðar­inn­ar“

Guðmund­ur Ari Sig­ur­jóns­son, þingmaður Sam­fylk­ing­ar­inn­ar, tók til máls skömmu síðar og minnti á að málið hefði fengið ít­ar­lega um­fjöll­un í nefnd­um þings­ins.

„Svo þegar það á að af­greiða málið þá er allt ómögu­legt, allt er órætt og eft­ir að fá gesti. Þetta er nátt­úr­lega bara firra,“ sagði þingmaður­inn, sem tók jafn­framt fram að hann óttaðist að minni­hlut­inn væri nú ein­fald­lega að reyna að stoppa málið því þeir væru því ósam­mála.

„Þetta snýst ekki um formið. Þetta snýst um það að hátt­virt­ir þing­menn minni­hlut­ans eru að standa vörð um sér­hags­muni stór­út­gerðar­inn­ar, vilja ekki að veiðigjald­inu sé hróflað og eru því að festa sig í form­inu.

Hátt­virt­ur for­seti. Ég tel þetta miður að vera að beina þess­um orðum til þín eða hátt­virts for­manns at­vinnu­vega­nefnd­ar, því hér er vandað til verka hjá öll­um nema stjórn­ar­and­stöðunni.“

Guðmund­ur Ari Sig­ur­jóns­son, þingmaður Sam­fylk­ing­ar­inn­ar. mbl.is/​Eyþór

Illa unnið, illa ígrundað og með lé­leg­an rök­stuðning

Gagn­rýni stjórn­ar­and­stöðunn­ar hélt þó áfram. Þar steig meðal ann­ars Bryn­dís Har­alds­dótt­ir, þingmaður Sjálf­stæðis­flokks­ins, fram og sagði að „væl og skæl“ kæmi frá meiri­hlut­an­um vegna þess að stjórn­ar­andstaðan væri að sinna sínu lýðræðis­lega hlut­verki.

Þá kæmi hvert mál á fæt­ur öðru frá rík­is­stjórn­inni sem væri illa unnið, illa ígrundað og með lé­leg­an rök­stuðning.

Jón Gunn­ars­son hélt gagn­rýni sinni einnig áfram. Sagði hann gesta­fjölda nefnd­ar­inn­ar vafa­sam­an og að óskað hefði verið eft­ir lista yfir þá gesti sem hefðu komið fyr­ir nefnd­ina á þriðju­dag. Sá listi væri enn ekki kom­inn.

Þá væri það lít­ilsvirðing gagn­vart full­trú­um al­menn­ings, sér­fræðing­um, rík­is­stofn­un­um og sveit­ar­fé­lög­um að þeim væri neitað um að koma fyr­ir nefnd­ina.

Bryn­dís Har­alds­dótt­ir, þingmaður Sjálf­stæðis­flokks­ins. mbl.is/​Eyþór