Varnarmál Íslands | 26. júní 2025

Peningarnir fara ekki inn á erlendan bankareikning

Leiðtogafundur Atlantshafsbandalagsins (NATO) var sögulegur og ljóst er að aðildarríkin standa þétt við bakið á Úkraínu. Aukin útgjöld Íslands í varnar- og öryggismál fara í innviði á Íslandi, en ekki á erlendan bankareikning hjá NATO.

Peningarnir fara ekki inn á erlendan bankareikning

Varnarmál Íslands | 26. júní 2025

Þorgerður ræddi við mbl.is um leiðtogafundinn sem hún sótti. mbl.is/Eggert Jóhannesson

Þetta segir Þorgerður Katrín Gunnarsdóttir utanríkisráðherra í samtali við mbl.is.

Þorgerður sótti leiðtogafundinn ásamt Kristrúnu Frostadóttur forsætisráðherra í Haag í Hollandi. Á fundinum var samþykkt að aðildarríki myndu verja 5% af vergri landsframleiðslu í öryggis- og varnarmál og stuðningur við Úkraínu var ítrekaður.

„Ég tel að þessi leiðtogafundur hafi verið sögulegur fyrir margra hluta sakir. Það er yfirlýsing sem kom eftir fundinn sem undirstrikar fimmtu greinina, sem er svona lykillinn og hornsteinn í Atlantshafsbandalaginu. Í öðru lagi, sem eru náttúrulega stóru fréttirnar, eru að það er verið að hækka árleg útgjöld landanna sem eru í bandalaginu,“ segir Þorgerður og bætir við að eindreginn stuðningur við Úkraínu hafi verið undirstrikaður.

Frétt af mbl.is

Trump „sterkur og áhrifaríkur karakter“

Fjárfestum í innviðum á Íslandi

Ísland stefnir að því að verja 1,5% af vergri landsframleiðslu í öryggis- og varnarmál á næstu 10 árum. Þorgerður segir mikilvægt að átta sig á því að þetta séu ekki fjármunir sem fara á bankareikning NATO heldur fari í fjárfestingar í mikilvægum stofnunum og innviðum hér á landi.

„Hvort sem það er í Keflavík [varnarsvæðið] eða í Landhelgisgæsluna, sem hefur löngu verið talað um að þurfi að byggja upp, eflingu sérsveitarinnar, ríkislögreglustjóra og ýmislegt fleira sem að fellur til. Ég tala nú ekki um netöryggismálin og CERTÍS og fleira sem að við þurfum að gefa frekar í,“ segir Þorgerður.

Með þessu sé Ísland að sýna fram á að þjóðin uppfylli þær skuldbindingar sem hún taki að sér. Ísland hafi hingað til uppfyllt skyldur sínar gagnvart NATO og ætli að gera það áfram.

Frétt af mbl.is

Söguleg ákvörðun í Haag: Stórauka útgjöld

„Rödd okkar skiptir máli“

Þorgerður segir að rödd Íslands sé skýr í bandalaginu og að aðrir hlusti þegar við tölum. Leiðtogar annarra ríkja eru í ríkari mæli byrjaðir að tala um mikilvægi norðurslóða og þær hættur sem þar steðja að.

„Hluti af uppbyggingu Atlantshafsbandalagsins er meðal annars að geta staðið gegn þeim ógnum sem upp kunna að koma á norðurslóðum. Og við sjáum það alveg að Rússar eru með augun á norðurslóðunum og þar eru fleiri þjóðir líka eins og Kínverjar. Þannig að bandalagið þarf að vera tilbúið til að verja frið, frelsi og öryggi á svæðinu – hvort sem það er fyrir hérna í sunnan- og austanverðri Evrópu eða á norðurslóðum,“ segir Þorgerður og bætir við:

„Þannig að já, rödd okkar skiptir máli á ákveðnum sviðum og aðrar þjóðir vita alveg fyrir hvaða gildi við Íslendingar stöndum og höfum staðið fyrir í gegnum tíðina. Við viljum varðveita og styrkja lýðræðið og frelsið og erum talsmenn mannréttinda.“