Fjár­auki fyr­ir lyfj­um ókom­inn

„Fjár­lög­in á síðasta ári voru auðvitað mjög sér­stök, þau voru samþykkt í starfs­stjórn, þar sem ekki var verið að leggja nein­ar póli­tísk­ar áhersl­ur. Yf­ir­leitt eru gerðar tölu­verðar breyt­ing­ar við 2. umræðu, en það var látið liggja milli hluta vegna þess­ara sér­stöku aðstæðna í fyrra, og ráð fyr­ir því gert að ný rík­is­stjórn myndi bæta úr því í fjár­auka­lög­um,“ seg­ir Ingi­björg í sam­tali við Morg­un­blaðið.

„Nú virðast þær áhersl­ur komn­ar í ljós, því það er búið að taka þrjá fjár­auka til um­fjöll­un­ar og af­greiðslu í þing­inu á þessu rúma hálfa ári nýrr­ar rík­is­stjórn­ar, en þar hef­ur ekk­ert komið fram varðandi lyfja­kaup.“

Hún seg­ir að at­hygli hafi verið vak­in á þessu í fe­brú­ar, enda hafi lyfja­kostnaður auk­ist á und­an­förn­um árum, m.a. vegna nýrra og betri líf­tækni­lyfja sem auki lífs­gæði fólks og heilsu til mik­illa muna.

„Það er miður ef sú er raun­in, að við séum að drag­ast aft­ur úr öðrum ríkj­um Norður­landa á þessu sviði,“ seg­ir Ingi­björg, en tek­ur fram að um það hafi hún ekki séð annað en það sem fram kom í blaðinu í gær.

„En ef það er þannig að þar hafi fólk rík­ari rétt til betri lyfja en hér, þá er það tví­mæla­laust eitt­hvað sem við þurf­um að taka til skoðunar,“ seg­ir Ingi­björg og bæt­ir við að hún hafi ný­verið lagt fram fyr­ir­spurn til heil­brigðisráðherra um þróun lyfja­kostnaðar á und­an­förn­um árum.