Úkraínskar hersveitir hafa átt í hörðum bardögum við Rússa skammt frá bænum Chasiv Yar.
Bærinn er hernaðarlega mikilvægur því ef Rússar ná honum á sitt vald gætu þeir náð góðri fótfestu í Dónetsk-héraði í austurhluta Úkraínu.
Tilkynning úkraínska hersins um þessa hörðu bardaga kom á sama tíma og Volodimir Selenskí Úkraínuforseti mætti til fundar með leiðtogum G7-ríkjanna á Ítalíu. Þar vonast hann til að tryggja meira fjármagn fyrir hersveitir sínar, sem skortir vopn í baráttunni gegn Rússum.
Blaðafulltrúi úkraínska hersins sagði Rússa reyna, án árangurs, að ná fótfestu í Chasiv Yar en bætti við að mjög erfitt væri að verja svæðið.
„Óvinurinn notar allt sem hann hefur yfir að ráða, árásardróna, skotvopn og mannafla,” sagði blaðafulltrúinn.