Atli Steinn Guðmundsson
Sænsk stjórnvöld hafa veitt Bandaríkjamönnum aðgang að sautján herstöðvum í Svíþjóð með það fyrir augum að auðvelda bandalagsþjóðinni varnir Svíþjóðar og Skandinavíu komi til árásar á eitthvert ríkjanna eða þau öll.
Hefur sænska þingið nú lagt blessun sína yfir samninginn sem undirritaður var í desember og felur hann í sér að auk aðgengis að herstöðvunum sautján fái aðkomuherinn fulla þjálfunaraðstöðu og réttindi til að staðsetja hermenn sína að vild og framleiða hergögn í Svíþjóð.
Sex af átta stjórnmálaflokkum á þinginu veittu samningnum brautargengi, allir utan Vinstriflokksins og Græningja.
Samkvæmt samningnum, sem ber heitið Samkomulag um varnarsamstarf, Defense Cooperation Agreement, geta bandarískir hermenn komið fyrirvaralaust til Svíþjóðar komi til neyðarástands en fyrirkomulagið mun einnig gefa Atlantshafsbandalaginu NATO færi á að grípa til varna fyrir Eystrasaltslöndin ef þörf krefur.
„Við upplifum nú versta ástand öryggismála í Evrópu frá því í síðari heimsstyrjöldinni,“ sagði Aron Emilsson, þingmaður Svíþjóðardemókratana, við umræður um samninginn í sænska þinginu.
Tormod Heier, prófessor í herkænsku og hernaðaraðgerðum við Herskólann í Stokkhólmi, segir í viðtali við norska ríkisútvarpið NRK að samningurinn marki vatnaskil í samskiptum ríkjanna auk þess sem hann sendi Rússum þau skilaboð að erkióvinurinn í vestri hafi nú öðlast mun tryggari fótfestu í allri Norður-Evrópu.