Borgaryfirvöld í Brussel hafa neitað að halda þjóðadeildarleik Ísraels og Belgíu þann 6. september næstkomandi vegna öryggisógna og möguleika á mótmælum.
Belgíska knattspyrnusambandið samþykkti að halda leikinn á King Baudouin-leikvanginum, á bak við luktar dyr, en segir að borgaryfirvöld í Brussel hafi gripið inn í og neitað að halda leikinn.
„Við hörmum þá ákvörðun sem tekin var af Brussel-borg, sem hefur mikla reynslu af skipulagningu stórviðburða, að halda ekki leikinn á okkar heimavelli,“ sagði knattspyrnusambandið.
Borgaryfirvöld í Brussel telja það ekki ráðlegt að halda leik sem þennan á meðan stríðið í Gasa er í fullum gangi. Það muni án efa ýta undir mótmæli og leggja öryggi áhorfenda, leikmanna og borgarbúa í hættu.
Greint er frá því að leit að nýjum leikvangi fyrir leikinn sé þegar hafin. Þá líti ísraelska knattspyrnusambandið svo á að þetta sé ekki þeirra vandi til að leysa heldur Belgíu.