Vladimír Pútín Rússlandsforseti hitti To Lam, forseta Víetnam í morgun í opinberri heimsókn sinni til Hanoi.
Forsetarnir tveir munu ræða saman í víetnömsku höfuðborginni.
Síðar mun Pútín eiga fund með öðrum háttsettum Víetnömum, þar á meðal hinum valdamikla Nguyen Phu Trong, aðalritara Kommúnistaflokks Víetnams.
Ferðalagið til Víetnams er hluti af ferð Pútíns um Austur-Asíu. Fyrsta stoppið var í Norður-Kóreu þar sem hann og Kim Jong-un, leiðtogi Norður-Kóreu, undirrituðu varnarsamning.
Bandaríkjamenn hafa gagnrýnt Víetnama fyrir að bjóða Pútín til landsins og veita honum svigrúm til að óska eftir stuðningi vegna innrásar Rússlands í Úkraínu.