Fimm eru látnir og tugir slasaðir, þar af tíu alvarlega, eftir að gróðureldar kviknuðu í þó nokkrum þorpum í suðausturhluta Tyrklands í samfélagi Kúrda í nótt.
Heilbrigðisráðherra Tyrklands, Fahrettin Koca, greindi frá þessu.
Ljósmyndir á samfélagsmiðlum sýndu mikinn eld lýsa upp næturhimininn og var reykjarmökkurinn mikill í loftinu.
Að sögn Koca slösuðust 44 manneskjur. Fjögur teymi viðbragðsaðila voru send á vettvang ásamt 35 sjúkrabílum.