Verðbréfaeftirlit Bandaríkjanna (SEC) má ekki lengur þvinga sakborninga til að fara gegnum dómstólameðferð Verðbréfaeftirlitsins. Þess í stað hafa sakborningar rétt á því að mál þeirra séu tekin upp í alríkisdómstól.
Þetta kemur fram í úrskurði Hæstaréttar Bandaríkjanna þar sem sex dómarar kusu með á sama tíma og þrír dómarar kusu gegn.
Hingað til hefur Verðbréfaeftirlitið getað leyst úr tilteknum ágreiningsmálum um fullnustu refsingu með því að þeirra eigin dómstóll úrskurði í málum.
Það hefur lengi verið markmið íhaldsmanna að takmarka eftirlitsheimildir alríkisstofnana, en forysta þeirra er tilnefnd af forseta Bandaríkjanna.
Með úrskurðinum er Hæstiréttur að staðfesta niðurstöðu áfrýjunardómstóls sem hafði komist að þessari niðurstöðu í máli George Jarkesy, stofnanda fjárfestingarsjóðs, Hann hafði verið sektaður af Verðbréfaeftirlitinu um 300.000 bandaríkjadali fyrir verðbréfasvik og gert að endurgreiða 685.000 dali fyrir „ólöglegan hagnað“.
John Roberts hæstaréttardómari sagði í meirihlutaáliti að það bryti gegn stjórnarskrárbundnum rétti til dómstólameðferðar að þvinga sakborninga til að fara í gegnum dómstóla SEC frekar en alríkisdómstól.
Ákvörðunin gæti mögulega farið fyrir brjóstið á bandarískum stjórnvöldum, þar sem nokkrar aðrar eftirlitsstofnanir nota svipaða dómstóla.
„Ákærði sem á yfir höfði sér fjársvikamál á rétt á að fá að láta reyna á það fyrir kviðdómi jafningja sinna fyrir hlutlausum úrskurðaraðila,“ skrifaði Roberts í meirihlutaálitinu.
Sex íhaldssamir dómarar í Hæstarétti landsins studdu ákvörðunina, en þrír vinstrisinnaðir dómarar voru á öðru máli.
„Látið ekki blekkjast: Ákvörðunin í dag er valdníðsla,“ skrifaði Sonia Sotomayor hæstaréttardómari í minnihlutaálitinu.
Hún sagði að með þessu fordæmi gætu tugir stofnana verið sviptar valdi sínu til að framfylgja lögum sem Bandaríkjaþing hefur sett.