Maður á sextugsaldri játaði við yfirheyrslur í gær að hafa stungið konu á sjötugsaldri til bana á tjaldstæði í Aremark í Noregi á þriðjudaginn. Verjandi mannsins, Ann Turid Bugge, greindi NRK frá þessu.
„Hann er eyðilagður yfir þessu. Það segir sig eiginlega sjálft,“ sagði Bugge. Andlegt ástand mannsins var metið af sérfræðingum í gær.
Lögreglan hefur lagt hald á hníf sem talið er að hafi verið notaður við morðið.
Fólk sem býr nálægt tjaldstæðinu hafði áður sagt NRK að maðurinn hefði viðurkennt fyrir þeim að hafa drepið konuna, sem er á sjötugsaldri. Maðurinn lét lögregluna sjálfur vita af hnífstungunni. Hann var handtekinn á tjaldstæðinu stuttu seinna og er í varðhaldi.