Weinstein fluttur í skyndi á sjúkrahús
Setja bókamerki
Fyrrverandi kvikmyndaframleiðandinn Harvey Weinstein var í dag fluttur í skyndi á sjúkrahús þar sem hann fór í bráðaaðgerð á hjarta.
ABC-fréttastofan greinir frá.
Hafði Weinstein kvartað undan brjóstverkjum í fangelsinu á Rikers-eyju í New York þar sem hann afplánar nú dóma fyrir nauðgun og kynferðislega áreitni.
„Eins og við höfum margsinnis sagt áður, glímir herra Weinstein við fjölda heilsufarsvandamála sem þarfnast áframhaldandi meðferðar,“ sögðu fulltrúar Weinsteins, Craig Rothfeld og Juda Engelmayer, í yfirlýsingu í dag.
Kemur þar fram að Weinstein hafi verið fluttur á Bellevue-sjúkrahúsið í New York og þökkuðu fulltrúar hans þeim sem komu Weinstein á sjúkrahúsið fyrir að hafa brugðist fljótt við.
Weinstein var einnig fluttur á Bellevue-sjúkrahúsið í apríl.
Á að mæta fyrir rétt í vikunni
Weinstein er 72 ára gamall og var dæmdur sekur af dómstóli í New York fyrir nauðgun og kynferðisofbeldi gegn leikkonunni Jessicu Mann árið 2013 og fyrir að hafa kynferðislega áreitt aðstoðarkonuna Mimi Haleyi árið 2006. Hann hlaut 23 ára dóm fyrir brotin.
Í þessari viku á hann að mæta fyrir rétt í New York þar sem að saksóknarar hafa lagt fram sönnunargögn fyrir kviðdómi þar sem þeir vinna að því að tryggja nýja ákæru á hendur Weinstein vegna ákæru um kynferðisglæpi. Weinstein hefur neitað sök og sagt að samband sitt við konurnar hafi verið með samþykki.
Þá kom hann fyrir rétt nýlega í hjólastól og hefur farið fram á að vera áfram í gæsluvarðhaldi á Rikers-eyju þar sem hann hefur verið undir eftirliti lækna.
Hafna því að erindið hafi lekið úr ráðuneytinu
Foreldrar í Breiðholti taka málin í sínar hendur
Ekki sjálfsagt að Ísland verði undanskilið
Staðan verri en þegar lægsta punktinum var náð
Gætum séð fjölgun ferðamanna frá Evrópu
Ásthildur Lóa segir af sér
Átti „mjög gott“ spjall við Selenskí
Inga: „Flokkur fólksins segir nei“