Erlent | mbl | 20.9.2024 | 16:30

Svona er staðan 10 dögum frá kappræðum

Tíu dagar eru liðnir frá kappræðum Donalds Trumps, forsetaframbjóðanda repúblikana, og Kamölu Harris, forsetaframbjóðanda demókrata, og hefur Harris bætt við sig eilitlu fylgi í könnunum.

Í nýjasta þætti Spursmála fer blaðamaðurinn Hermann yfir enn eitt banatilræðið við Trump, kannanir í baráttunni um Hvíta húsið sem og kannanir fyrir komandi kosningar í öldungadeildinni.

Samkvæmt meðaltali RealClear Politics þá hefur Harris á síðastliðinni viku farið úr því að vera með rúmlega eins prósentustiga forskot á Trump yfir í það að vera með u.þ.b. tveggja prósentustiga forskot.

Hægt að hlusta og horfa á Spursmál á Spotify, YouTube og öllum helstu streymisveitum.

Harris leiðir nú í Pennsylvaníu

Þá myndi Harris hreppa 276 kjörmenn á sama tíma og Trump myndi fá 262 og áfram allt í járnum.

Helsta breytingin á milli vikna er sú að Harris leiðir í kjörmannakerfinu en Trump leiddi í síðustu viku.

Það má rekja til þess að nú mælist Harris með meira fylgi í Pennsylvaníu, en fyrir viku þá mældist Trump með forskot á Harris í því ríki.

Kamala Harris og Donald Trump tókust á í kappræðum fyrir 10 dögum. AFP

Staðan í kjörmannakerfinu samkvæmt könnunum. Harris leiðir nú naumlega. Tölvuteiknuð mynd/RealClear Politics/Hallur Már

Repúblikanar stefna á meirihluta í öldungadeildinni

Þá fór Hermann yfir stöðuna í baráttunni um öldungadeildina. Eins og öldungadeildin er skipuð í dag þá eru demókratar með 51 þingmann á móti 49 þingmönnum repúblikana.

Aftur á móti benda kannanir til þess að repúblikanar muni snúa öldungadeildinni í komandi kosningum.

Af þeim 49 þingmönnum sem repúblikanar eru með á þingi eru aðeins tveir í nokkuð samkeppnishæfri baráttu. Það myndu vera Ted Cruz í Texas-ríki og Rick Scott í Flórída-ríki. Kannanir benda þó til þess að þeir muni vinna.

Frétt af mbl.is

Repúblikanar freista þess að snúa öldungadeildinni

Staðan í öldungadeildinni samkvæmt könnunum. Repúblikanar munu bæta við sig tveimur þingsætum samkvæmt könnunum. Tölvuteiknuð mynd/RealClear Politics/Hallur Már

Herja á Vestur-Virginíu og Montana

Í Vestur-Virgínu hafa demókratar átt einn öldungadeildarþingmann, Joe Manchin, en hann hefur ákveðið að bjóða sig ekki fram aftur. Frambjóðandi repúblikana, Jim Justice, mun samkvæmt mælingum vinna afgerandi sigur.

Í Montana-ríki á þingmaður demókrata, Jon Tester, í vök að verjast. Hann er með mótframboð frá repúblikananum Tim Sheehy sem mælist nú orðið með nokkuð gott forskot á Tester.

Ef Sheehy vinnur eins og kannanir gera ráð fyrir þá fá repúblikanar meirihluta, að því gefnu að þeir haldi sætunum sínum og vinni í Vestur-Virginíu líka.

Gætu snúið þingsæti demókrata í Ohio

„En það eru sóknartækifæri fyrir repúblikana til að auka meirihlutann enn frekar,“ segir Hermann og bendir á að það séu fleiri spennandi baráttur í gangi og þá sérstaklega í Ohio-ríki.

Þingmaður demókrata í Ohio, Sherrod Brown, á í hörkubaráttu við frambjóðanda repúblikana, Bernie Moreno.

Brown mælist með 3,6 prósentustiga forskot að svo stöddu en það var meira fyrr í sumar. Þá má gera ráð fyrir því að Trump sigri forsetakosningarnar í ríkinu nokkuð þægilega í og mun það hjálpa Moreno.

Sigmundur Davíð Gunnlaugsson, formaður Miðflokksins, var aðalviðmælandi í nýjasta þætti Spursmála. Hægt er að horfa á þáttinn í spilaranum hér að neðan.