Hamas-leiðtogi var skólastjóri í skóla UNRWA
Setja bókamerki
Leiðtogi Hamas-hryðjuverkasamtakanna í Líbanon, sem felldur var á dögunum í loftárás, var starfsmaður Palestínuflóttamannahjálparinnar (UNRWA). Var hann skólastjóri í skóla á vegum Sameinuðu þjóðanna.
Fatah Sharif Abu al-Amine var leiðtogi Hamas í Líbanon en var drepinn í víðtækari loftárás gegn leiðtogum Hisbollah og Hamas á mánudag.
UNRWA segir nú að hann hafi verið skólastjóri í skóla á vegum stofnunarinnar en hann hafði verið í leyfi frá störfum síðan í mars vegna grunaðra tengsla við Hamas, eftir að Ísraelsmenn sökuðu hann og fjölda annarra starfsmanna UNRWA um að vera með tengsl við Hamas.
Wall Street Journal greinir frá.
Bar ábyrgð á samhæfingu hryðjuverkasamtaka
Sharif bar ábyrgð á stjórnmála- og hryðjuverkastarfsemi Hamas-samtakanna í Líbanon og samhæfði árásir gegn Ísrael með líbönsku hryðjuverkasamtökunum Hisbollah, að því er Ísraelsher sagði í gær.
Ísraelar hafa lengi kvartað yfir því að UNRWA, sem sér um menntun, heilbrigðisþjónustu og aðra aðstoð við palestínska flóttamenn, sé hlutdrægt gagnvart Ísrael og að hluti starfsmanna þess séu meðlimir í Hamas og öðrum hryðjuverkasamtökum.
Fleiri starfsmenn UNRWA með bein tengsl við Hamas
Í febrúar fyrr á þessu ári sögðust Ísraelar hafa sannanir fyrir því að starfsmenn UNRWA hefðu tekið þátt í árás Hamas og fundust þá einnig göng Hamas-samtakanna undir skólum UNRWA á Gasa.
Í kjölfarið frystu mörg ríki tímabundið fjárstuðning sinn til stofnunarinnar, þar á meðal íslensk stjórnvöld.
Sameinuðu þjóðirnar tilkynntu í ágúst að níu starfsmenn UNRWA hefðu að öllum líkindum átt aðild að stórfelldri hryðjuverkaárás Hamas á Ísrael, þann 7. október 2023, þar sem hátt í 1.200 voru myrtir, og á þriðja hundrað gíslar teknir. Voru þeir allir reknir.
Ísland styrkir UNRWA um 290 milljónir króna í ár
Mörg ríki hófu þó fjárstuðning sinn við UNRWA á ný eftir að rannsókn á ásökunum Ísraela hófst, en í júní á þessu ári tilkynnti Ásmundur Einar Daðason, barna- og menntamálaráðherra, um að íslensk stjórnvöld myndu hækka fjárframlög til stofnunarinnar um 100 milljónir á þessu ári.
Samanlögð framlög Íslands til stofnunarinnar munu því nema um 290 milljónum króna í ár.
„Þetta er auðvitað ekki ásættanlegt“
Íran hefur loftárás og skotárás í Tel Avív
Listaverk Nínu á nýjan stað
Býður almenningi að tjá sig um „aðgerðirnar“
Stýrivextir lækkaðir um 0,25 prósentustig
/frimg/1/51/90/1519050.jpg)
Vandi heimilislausra vex mikið
Vill aðgerðir í stað orða: Krísa í leikskólum