Bretar og ESB vilja styrkja samstarfið

Forsvarsmenn Breta og Evrópusambandsins hafa undirritað yfirlýsingu þar sem þeir heita því að styrkja samband sitt að nýju eftir Brexit-samkomulagið frá því Bretar yfirgáfu sambandið.

Í sameiginlegri yfirlýsingu frá Keir Starmer forsætisráðherra Bretlands og Urslulu von der Leyen, forseta framkvæmdastjórnar Evrópusambandsins, er greint frá því að verið sé að meta á hvaða sviðum hægt verði að styrkja samstarf.

Sérstaklega er tilgreint að stefnt sé að frekara samstarfi í öryggis-, orku- og efnhagsmálum.

Hagsmunir í öndvegi 

Þrátt fyrir þýðu í samskiptum hafnaði Starmer því að um kúvendingu væri að ræða í afstöðu Breta til Evrópusambandsins. Hann sagði hins vegar að um væri að ræða praktíska nálgun á samskiptin þar sem siðsemi og hagsmunir væru í öndvegi.

Þá sagði Starmer einnig að tími væri til kominn að horfa til framtíðar án þess að atburðarásin sem leiddi til Brexit yrði í brennidepli.

Fundur von Leyden og Starmer fór fram í gær og var hann sá fyrsti sem forsætisráðherrann hefur haldið með forsvarsmönnum sambandsins síðan hann tók við embætti í júlí.

Bresk fyrirtæki tekið skell 

Starmer hefur þegar haft á orði að hann vilji beita sér gegn viðskiptahindrunum gagnvart Evrópska efnahagssvæðinu en eins og fram hefur komið urðu mörg bresk fyrirtæki fyrir skakkaföllum þegar þau misstu aðgang að EES-svæðinu. 

Starmer hefur þó talað með skýrum hætti um það að hann vilji ekki taka aftur upp fyrirkomulag frjáls flæðis verkafólks á milli landa og opin landamæri.

Á móti hefur Evrópusambandið lýst því yfir að ekki verði í boði að handvelja kosti sambandsins. 

Frétt af mbl.is

Verði auðveldara að fara til og frá Bretlandi

Ekkert samkomulag um unga fólkið

Ljóst er að frekara samstarf gæti reynst einhverjum vandkvæðum háð. Evrópusambandið lagði fram tillögu í apríl um að ungu fólki reyndist auðveldara að ferðast til og frá landa sambandsins og Bretlands. Tillagan mætti mikilli andúð meðal þeirra sem harðastir eru í Brexit-afstöðu sinni. 

Starmer hefur sjálfur sagt að ekkert verði af slíku samstarfi að svo stöddu vegna andstöðunnar. 

• Blogga um frétt