Heilbrigðisráðuneytið í Líbanon segir minnst fimm hafa látið lífið í árás Ísraelshers á borgina Nabatiyeh í suðurhluta landsins. Meðal hinna látnu er borgarstjórinn Ahmad Kahil.
Viðbragðsaðilar eru enn á vettvangi að leita að fólki í rústum byggingar sem ísraelskar eldflaugar hæfðu.
Ísraelsher skaut minnst ellefu eldflaugum á Nabatiyeh og nágrenni í morgun, að sögn yfirvalda í Líbanon.
Ísraelsher gerði einnig árás á Beirút, höfuðborg Líbanon, í morgun. Fimm dagar eru liðnir frá síðustu árásum hersins.
Snemma í morgun sagði Ísraelsher að um 50 eldflaugum hefði verið skotið að Norður-Ísrael frá Líbanon. Ekkert mannfall hefur verið tilkynnt.