Erlent | AFP | 13.11.2024 | 11:10 | Uppfært 12:01

Biden bauð Trump í heimsókn

Joe Biden og Donald Trump munu ræða málin í Hvíta húsinu í dag. AFP

Donald Trump, verðandi forseti Bandaríkjanna, mun eiga fund með Joe Biden Bandaríkjaforseta í Hvíta húsinu í dag. Þetta verður fyrsta heimsókn Trumps í Hvíta húsið í fjögur ár.

Trump hefur haft í nógu að snúast undanfarna daga við að skipa í æðstu embætti næstu ríkisstjórnar. Þar mun m.a. Elon Musk, ríkasti maður í heimi, eiga sæti sem yfirmaður teymis sem er ætlað það hlutverk að draga verulega úr ríkisútgjöldum.

Frétt af mbl.is

Musk annar stjórnenda nýs ráðuneytis Trumps

Biden bauð Trump til fundarins, sem fer fram á skrifstofu forsetans klukkan 11 að staðartíma í Washington (kl. 16 að íslenskum tíma). Búist er við að Biden muni leggja áherslu á að valdaskiptin fari hnökralaust og friðsamlega fram, auk þess sem Biden er sagður ætla að leggja áherslu á að Bandaríkin haldi áfram að styðja við bakið á Úkraínu.

„Hann hefur trú á hefðunum. Hann treystir okkar stofnunum,“ segir Karine Jean-Pierre, talskona Hvíta hússins, við blaðamenn þegar hún var spurð af hverju Biden hefði boðið Trump í heimsókn.

„Bandaríska þjóðin á þetta skilið. Hún á það skilið að valdaskiptin fari friðsamlega fram.“