Ása Ellerup flutt út og ætlar að selja húsið
Setja bókamerki
Ása Ellerup, eiginkona meinta raðmorðingjans Rex Heuermann, ætlar að setja hús fjölskyldunnar í Long Island í sölu.
New York Times greinir frá þessu en DV greindi frá fyrstur íslenskra miðla.
Í grein NYT segir að flutningagámur hafi verið fyrir utan hús Ásu í Massapequa Park í vikunni.
„Það besta sem gæti komið fyrir er að þeir jafni húsið við jörðu og byggi nýtt svo að minning þess sé afmáð,“ sagði hinn áttræði nágranni Ásu, Albert Cella.
Heuermann er nú í fangelsi í Suffolk–sýslu og býður réttarhalda. Hann er ákærður fyrir að hafa myrt sex konur frá árinu 1993. Hann neitar sök.
Að sögn lögmanns Ásu ætlar hún að flytja til Suður-Karólínu með tveimur uppkomnum börnum sínum. Hún keypti hús þar fyrir nokkrum árum til þess að eyða elliárunum í.
Að sögn lögmanns Ásu mun skilnaður þeirra hjóna ganga í gegn á næstu sex mánuðum og verður þá heimilið í Massapequa Park sett á sölu.
Bjuggu í húsinu í þrjá áratugi
Húsið er æskuheimili Heuermanns og bjó Ása með honum þar síðustu þrjá áratugi.
Frá heimilinu fór Heuermann á skrifstofu sína á Manhattan þar sem hann starfaði sem arkitekt.
Að sögn saksóknara hitti hann svo vændiskonur nokkur örlagarík kvöld, myrti þær og skildi lík þeirra eftir á Gilgo–strönd og víðar.
Í kjallara hússins er Heuermann sagður hafa geymt vopn og „skipulagsskjal“ fyrir morðin.
Er Heuermann var handtekinn í júlí árið 2023 bjuggu Ása og börn hennar áfram í húsinu, jafnvel eftir að lögregla sneri öllu á hvolf og lagði hald á umfangsmikið magn af sönnunargögnum.
Ása skrifaði undir samning við framleiðslufyrirtækið Peacock/NBC um gerð heimildarmyndar um líf þeirra fyrir ári síðan.
„Vandinn liggur augljóslega hjá Ísrael“
„Ótrúlegar“ björgunaraðgerðir í Ólafsfirði
Nýr skóli á Bíldudal fyrir árslok
Forsendur byggist á loftinu einu saman
Stuðlar eina úrræðið fyrir börn í geðrofi
Tregðan við að deila gögnum „ bara skrýtin“
„Ríki og leiðtogar gerðir ábyrgir“
Framhaldið veltur á viðbrögðum Írana