Erlent | AFP | 24.11.2024 | 8:41

Yfir 40 billjónir til þróunarríkja á ári

Loftslagsráðstefna Sameinuðu þjóðanna, COP29, fór fram í Bakú. AFP/Stringer

Samkomulag náðist á COP29 loftslagsráðstefnunni í Bakú í Aserbaídjan í nótt eftir þrjá daga af stífum viðræðum. Í samkomulaginu er kveðið á um að framlög ríkra þjóða til fátækari ríkja á hverju ári fram að árinu 2035 skuli nema að minnsta kosti 300 milljörðum Bandaríkjadala, eða rúmlega 40 billjónum íslenskra króna.

Samkvæmt sáttmála Sameinuðu þjóðanna frá árinu 1992 eru 23 ríki skilgreind sem þróuð ríki, auk Evrópusambandsins, sem eru ábyrg fyrir mestri losun gróðurhúsalofttegunda og því skuldbundin til að leggja sitt af mörkum í baráttunni við loftslagsbreytingar.

Upphæðin hefur hækkað um 100 milljarða á milli ára en samningur síðasta árs gildir til 2025.

Frétt af mbl.is

Lagt til að fátækari þjóðum verði hjálpað

Nokkur þróunarríki kröfðust hins vegar 500 milljarða ársframlaga í viðræðunum.

Í samkomulaginu segir að fjármagnið muni koma beint úr fjölbreyttum áttum, svo sem með ríkisframlögum, fjárfestingum einkageiranum og annarri fjármögnun.

Þá er vísað í mögulega alþjóðlega skatta á flugsamgöngur og sjávarútveg.

Vonir standa til að fjármagnið muni efla fjárfestingu einkageirans og skili 1,3 billjón dollurum fyrir næsta áratug. Það er sú upphæð sem sérfræðingar Sameinuðu þjóðanna telja að þurfi fyrir árið 2035 í baráttunni við loftslagsbreytingar.

Kína neitar að taka þátt

Bandaríkin og Evrópusambandið kröfðust þess að ríki sem eru skráð sem þróunarríki, en eru orðin auðug, svo sem Kína og Sádi-Arabía, ættu að taka þátt í fjárframlögunum.

Kína, sem er annað stærsta hagkerfi heims og það ríki sem losar mest af gróðurhúsalofttegundum, hafnaði því og benti á að ríkið veitti nú þegar tvíhliða aðstoð.

Samkomulagið kveður á um að þróuð ríki heims „taki forystuna“ í að leggja fram umsamda 300 milljarða dollara og því er gefið til kynna að önnur ríki gætu tekið þátt.

Samkomulagið „hvetur“ þróunarríki til að „leggja sitt af mörkum“, en það sé þó valfrjálst.

Allt sem önnur ríki heims leggja fram telst til 300 milljarða dollara ársmarkmiðsins.

Næsta loftslagsráðstefna verður haldin í Brasilíu að ári.