Erlent | mbl | 28.12.2024 | 22:21

15 menn áfrýja dómum sínum í máli Gisèle Pelicot

Pelicot kveðst óhrædd við ný réttarhöld í málinu. AFP

Í það minnsta 15 menn sem voru fundnir sekir um að hafa nauðgað eða misnotað Gisèle Pelicot hafa áfrýjað niðurstöðu dómsins.

Frá þessu greinir The Independent.

Alls voru 51 maður sakaður um að hafa brotið kynferðislega á Gisèle með aðstoð þáverandi eiginmanns hennar, Dominique Pelicot, á meðan hún var án meðvitundar. Voru þeir allir sakfelldir í málinu og hlaut fyrrverandi eiginmaður þyngstan dóm allra sakborninganna eða 20 ára dóm.

Var fyrrverandi eiginmaður hennar meðal annars sakfelldur fyrir að hafa skipulagt brotin en hann viðurkenndi að hafa í tæpan áratug byrlað Gisèle ólyfjan svo hann og tugir annarra gætu nauðgað henni.

Mennirnir hafa frest þar til miðnættis á mánudag að áfrýja dómnum.

Frétt af mbl.is

Dominique Pelicot dæmdur í 20 ára fangelsi

Kveðst óhrædd við ný réttarhöld

Gisèle er 72 ára gömul og hefur verið hampað sem hetju og táknmynd femínista fyrir hugrekki hennar og virðuleika á meðan réttarhöldin fóru fram en þau tóku þrjá mánuði. Hún afsalaði sér nafnleynd í málinu og vildi varpa ljósi á réttarhöldin til að færa skömmina frá þolendum kynferðisofbeldis og til gerenda þess.

Hún kveðst ekki óttast að ný réttarhöld fari fram í málinu.