„Við“ er tvíeggjað orð

„Við“ er tvíeggjað orð fyrir mig að nota því að ég er líka einn af „þeim“,“ skrifar rithöfundurinn Viet Thanh Nguyen í grein, sem birtist í blaðinu Tímamót, sem fylgir Morgunblaðinu í dag, laugardag. „Ég var sjálfur flóttamaður og er barn flóttamanna. Jafnvel þótt ég eigi hús og sé með bandarískan ríkisborgararétt lít ég á mig sem einn af „þeim“ í anda ef ekki í raun. Eins og margir flóttamenn hef ég aldrei getað gleymt hvernig það er að vera á vergangi og vera minna en mennskur í augum stórs hluta heimsins.

Viet Thanh Nguyen rithöfundur. The New York Times/Joyce Kim

Sumum flóttamönnum er hins vegar svo í mun að gleyma þessari reynslu að þeir snúast gegn öðrum sem leita skjóls yfir alþjóðleg landamæri. Það er því kaldhæðnislegt þegar til dæmis sumir þessara flóttamanna eða afkomendur þeirra krefjast þess að halda nýjum aðkomumönnum úti með jafn háværum hætti og þeir, sem eru með rætur, sem ná lengra aftur. „Við erum góðu flóttamennirnir,“ er fullyrt. „Þessir nýju flótta- og förumenn eru þeir slæmu og ólöglegir. Við komum löglegu leiðina.““

Viet Thanh Nguyen flúði með fjölskyldu sinni frá Víetnam eftir að Saigon féll árið 1975. Hann var þá barn að aldri. Fyrsta skáldsaga hans heitir The Sympathizer og hlaut hann Pulitzer-verðlaunin fyrir hana árið 2016. Fyrir skömmu var gerð sjónvarpsþáttaröð eftir bókinni.

Grein hans birtist í heild sinni í blaðinu Tímamótum, sem Morgunblaðið gefur út í samvinnu við The New York Times og fylgir Morgunblaðinu í árslok.

• Blogga um frétt