Mussolini „góður stjórnmálamaður“

Giorgia Meloni, forsætisráðherra Ítalíu, útilokaði á föstudag að fjarlægja þrílitan loga af merki flokks síns, þrátt fyrir ráðgjöf gegn fasistatáknum.

„Að fjarlægja logann... hefur aldrei verið mál á dagskrá,“ sagði Meloni í viðtali við fjölmiðilinn Corriere della Sera.

Þessi staðhæfing hennar kom í framhaldi af ummælum ráðherrans Luca Ciriani, sem einnig er meðlimur íhaldssama flokksins Brothers of Italy (FdI), en hann sagði: „Tíminn mun koma til að slökkva eldinn.“

„Þetta er táknrænt og eins og svo margt annað táknrænt mun það eiga sinn dag, jafnvel þótt það verði ekki yfirgefið algjörlega,“ sagði Ciriani við fjölmiðla í nóvember.

Hægrisinnaðasti leiðtogi Ítalíu

Meloni, líklega hægrisinnaðasti leiðtogi Ítalíu síðan 1945, hefur reynt að fjarlægjast arfleifð flokksins. Hann var stofnaður árið 2012 og á rætur sínar að rekja til nýfasista ítölsku félagshreyfingarinnar (MSI).

Sem ungur aðgerðarsinni árið 1996 sagðist hún telja fasistastjórnandann Benito Mussolini „góðan stjórnmálamann“ á tímum síðari heimsstyrjaldarinnar. En sérfræðingar hafa sagt grunninn í lógóinu tákna grafhýsi Mussolini í heimabæ hans Predappio, sem tugþúsundir gesta heimsækja á hverju ári.

Nú heldur hún því fram að þeir sem haldnir eru fortíðarþrá fyrir fasisma „eigi engan stað“ í ítölskum stjórnmálum.

Andstæðingar hennar, þar á meðal nokkrir meðlimir sama flokks, krefjast þess reglulega að loginn, grænn, hvítur og rauður líkt og ítalski fáninn, verði fjarlægður.

Loginn varð hluti af merki flokksins árið 2014 og fara nokkrir háttsettir embættismenn flokksins ekki leynt með aðdáun sína á fasistastjórninni sem setti kynþáttalög gegn gyðingum árið 1938.

• 1 blogg um fréttina

Bloggað um fréttina

• Guðjón E. Hreinberg: Úreltar djöflamerkingar