Bregðast við gagnrýni Grænlendinga

Ríkisstjórn Danmerkur og landsstjórn Grænlands hafa fallist á sameiginlega lausn í máli er varðar „foreldrahæfnipróf“ en dönsk stjórnvöld hafa síðasta mánuðinn sætt þungri gagnrýni vegna prófanna sem eru sögð mismuna Grænlendingum í Danmörku.

Prófin eru notuð víða í Danmörku sem hluti af barnaverndarrannsóknum en hafa lengi verið gagnrýnd af mannréttindastofnunum og grænlenskum stjórnmálamönnum, sem segja þau gjarnan ekki gera ráð fyrir tungumálamúrum eða menningarmun.

Rúmlega 5% grænlenskra barna í Danmörku eru sett á fósturheimili en aðeins 1% danskra barna.

Öflug mótmæli

Málið komst aftur í sviðsljós fjölmiðla í desember þegar nýfætt barn Keiru Alexöndru Kronvold var tekið af henni aðeins tveimur tímum eftir fæðingu á spítala á Norður-Jótlandi. Málið knúði fram öflug mótmæli í Nuuk og Kaupmannahöfn.

Í yfirlýsingu segir félags- og húsnæðismálaráðuneyti Dana að stjórnvöld hafi fallist á sameiginlega lausn sem verði kynnt í vikunni.

Þetta gerist einmitt skömmu eftir að Múte Egede formaður landsstjórnarinnar gaf í skyn að kosning um sjálfstæði Grænlands væri væntanleg.

Frétt af mbl.is

Kaup á Grænlandi og Íslandi skoðuð 1867